Els fan uraziun en la grotta, survegnan unschidas, fan bogn en l'aua «sontga» da Lourdes e chantan l'Ave Maria a la processiun da la glisch: Ils milliuns pelegrins che viagian mintg'onn a Lourdes, in dals lieus da pelegrinadi ils pli impurtants dal mund. A Lourdes duai Nossadunna esser cumparida pliras giadas a sontga Bernadette.
Il mitus da l'appariziun da Nossadunna
Igl è stà ils 11 da favrer 1858, cura ch'il mund d'ina matta da Lourdes duai esser sa midà per adina. Ella è stada la figlia da muliners povers, na saveva betg scriver ed era in pau maladitscha cun sia asma. Tuttina ha ella midà il destin dad in'entira regiun. Ses num: Bernadette Soubirous. Tenor il mitus ha la matta da 14 onns numnadamain vis en ina grotta cun il num Massabielle, datiers da la citad da Lourdes, la Nossadunna. E quai betg be ina giada, mabain 18 giadas entaifer in mez onn. Tenor il raquint ha Nossadunna supplitgà Bernadette da stgavar ina funtauna.
Lieu da miraclas, da forza – e da commerzi
Passa 7'000 miraclas potenzialas èn vegnidas registradas fin oz a Lourdes. Suenter scleriments scientifics èn 70 da quellas effectivamain vegnidas renconuschidas sco guariziuns miraculusas. La speranza sin guariziun accumpogna pia fin oz las pelegrinas sin lur viadi – ed animescha era nundumbraivels affarists, da far buns affars cun souvenirs.
Chant e messa rumantscha a Lourdes
Er il rumantsch è represchentà bain a Lourdes. I dat ina messa rumantscha e la via da la crusch vegn era fatga per rumantsch. RTR ha quest onn sa maschadà tranter ils pelegrins e las pelegrinas. Ed ha tranter auter inscuntrà Maria Coray, ch'è l'emprima giada a Lourdes, sco era Maria Barla Riedi ed Anna Helena Cavelti, ch'èn gia dapi decennis gidantras. Da quels inscunters, d'impressiuns fascinantas e muments commovents a Lourdes udis en «Vita e cretta».
Il mitus da l'appariziun da Nossadunna
Igl è stà ils 11 da favrer 1858, cura ch'il mund d'ina matta da Lourdes duai esser sa midà per adina. Ella è stada la figlia da muliners povers, na saveva betg scriver ed era in pau maladitscha cun sia asma. Tuttina ha ella midà il destin dad in'entira regiun. Ses num: Bernadette Soubirous. Tenor il mitus ha la matta da 14 onns numnadamain vis en ina grotta cun il num Massabielle, datiers da la citad da Lourdes, la Nossadunna. E quai betg be ina giada, mabain 18 giadas entaifer in mez onn. Tenor il raquint ha Nossadunna supplitgà Bernadette da stgavar ina funtauna.
Lieu da miraclas, da forza – e da commerzi
Passa 7'000 miraclas potenzialas èn vegnidas registradas fin oz a Lourdes. Suenter scleriments scientifics èn 70 da quellas effectivamain vegnidas renconuschidas sco guariziuns miraculusas. La speranza sin guariziun accumpogna pia fin oz las pelegrinas sin lur viadi – ed animescha era nundumbraivels affarists, da far buns affars cun souvenirs.
Chant e messa rumantscha a Lourdes
Er il rumantsch è represchentà bain a Lourdes. I dat ina messa rumantscha e la via da la crusch vegn era fatga per rumantsch. RTR ha quest onn sa maschadà tranter ils pelegrins e las pelegrinas. Ed ha tranter auter inscuntrà Maria Coray, ch'è l'emprima giada a Lourdes, sco era Maria Barla Riedi ed Anna Helena Cavelti, ch'èn gia dapi decennis gidantras. Da quels inscunters, d'impressiuns fascinantas e muments commovents a Lourdes udis en «Vita e cretta».
