Pli baud han mattas e mats en Svizra savens prestà ina contribuziun indispensabla per l'existenza finanziala da lur famiglias, spezialmain en l'agricultura. Uffants pertgiravan muvel, faschevan or d'uigl e gidavan a far fain.
Cun l'industrialisaziun en il 19avel tschientaner èn uffants alura vegnids malduvrads sco forzas da lavur bunmartgadas en numerusas fabricas en Svizra, principalmain en fabricas da textilias. Fin 16 uras a di u era da notg han els stuì sa mazzacrar, per part gia a partir dad 8 onns. Quai ha gì grevas consequenzas per lur svilup psichic e fisic.
Il destin dals uffants che stuevan lavurar en Svizra mussa l'exposiziun actuala «Arbeitende Kinder im 19. und 20. Jahrhundert» en il Forum da l'istorgia svizra a Sviz. Sut la Marella vegn era prendì il destin dals «Schuobacheclers», ils uffants sclavs dal Grischun che vevan da lavurar en il Schuob durant insaquants mais da l'onn e che vegnivan era savens maltractads. Vita e cretta ha visità l'exposiziun.