La vardad sur dad Eva – Evoluziun

Ils emprims 195'000 onns è tut ì bain per las dunnas. Chatschaders e rimnadras han contribuì al surviver da la gruppa, di Carel van Schaik ch'è biolog d'evoluziun e scienzià dal cumportament. Umens e dunnas èn ids a chatscha e han rimnà vivonda. Igl era in dar e prender.

Redacziun: Claudia Cathomen

Ma tge è schabegià avant 5'000 onns che quel dar e prender n'ha betg pli funcziunà? Tenor Carel van Schaik ha tut cumenzà cun la domiciliaziun dals chatschaders e rimnaders. Plaun plaunet è l'agricultura naschida. Sch'ins sa domiciliescha, han ins insacura sias atgnas reservas. Ins n'è betg pli avisà sin tschel u tschella. Cura che l'agricultura è s'etablescha ves'ins che las gruppas sa furman en singulas famiglias. Ellas han lur atgnas reservas e plaunet er l'agen funs. Sch'i dat possess privat, lura datti spert quels ch'han dapli e quels ch'han damain. E facultad ston ins laschar ir en ierta. E tgi erta? L'emprim figl. Uschia ch'igl ha cumenzà a dar clans cun patriarcs ritgs a la testa, e blers umens povers e tut las dunnas èn vegnidas martganzia.

Singulas contribuziuns

Zum Audio

In mund gist tar chatschaders e rimnadras

Durada 13 minutas 3 Secundas , Claudia Cathomen

Durant 99% da l'istorgia da l'umanitad n'era l'egualitad nagin problem. Tar ils carstgauns ves'ins il fenomen rar che umens èn bain pli gronds che las dunnas, ma ch'els na domineschan betg. Ils emprims 195'000 onns devi l'egualitad. Igl era in dar e prender.