Sin l'entir mund na pon 244 milliuns uffants en la vegliadetgna da scola betg ir a scola. Damai n'ha quasi mintga tschintgavel uffant nagin access a la furmaziun. Savens sajan quels uffants exposts ad ina ristga augmentada da povradad ed exclusiun sociala. Quai scriva la Chadaina da Fortuna sin sia pagina-web. Era persunas giuvnas en Svizra sajan pertutgadas. Tar nus n'haja mintga 10avla persuna nagina finiziun da scola.
Perquai organisescha la Chadaina da Fortuna ensemen cun la SRG SSR in di naziunal da solidaritad e quai ils 21 da december 2023. La Capriola è ina da las instituziuns grischunas che vegnan sustegnidas finanzialmain da la Chadaina da Fortuna a chaschun da quest di da solidaritad.
La Capriola porscha ina scolaziun a giuvens e giuvnas che pateschan da differents problems psichics. Damai persunas che dovran sustegn. Quai fa La Capriola cun in concept da scolaziun spezial ed ensemen cun manaschis partenaris en ils secturs hotellaria e gastronomia sco er en il commerzi en detagl.
Co che quest concept da scolaziun spezial è cumponì e co ch'il sustegn a favur da las persunas giuvnas vesa or, quai explitgescha il mainafatschenta da La Capriola, Conrad Cadonau, en Vita e cretta. El di era tge ch'è impurtant en connex cun accumpagnar talas persunas en ina vita autonoma. Ed ina da quellas persunas giuvnas, Annica Curschellas, raquinta tge experientschas ch'ella fa e co ch'ella profitescha da la scolaziun tar La Capriola.
