Dapi in onn datti la «Lètg per tuts» en Svizra. Quai munta che pèrs da la medema schlattaina dastgan maridar. Cun quest dretg èn persunas omosexualas e generalmain persunas LGBTQ+ vegnidas in pass pli datiers a l'egualitad. Promova l'egualitad da questas persunas era lur toleranza ed acceptanza entaifer la societad? U giogan persunas LGBTQ+ era cun il fieu, sch'ellas preschentan e celebreschan lur sexualitad publicamain e pretendan toleranza cun insistenza?
Gino Carigiet da Siat che abita a Soloturn è enconuschent sco chantadur da la band «Dus». El viva sco um omosexual e tradescha a Vita e cretta co ch'el percepescha ses conturn e la societad en vista a la toleranza.
A varsaquantas dumondas en quel connex respunda Gino Carigiet, per exempel nua che la toleranza cumenza e nua ch'ella chala. Ubain sche persunas omosexualas èn en general pli tolerantas damai ch'ellas sezzas èn savens confruntadas cun intoleranza.
