La devoziun da penetienza communabla ed autras pussaivladads sco il discurs da penetienza han per la gronda part remplazzà il confessiunal. En centers spirituals sco la Claustra da Mustér han ils paders l'emna da Pasca l'agenda plaina cun glieud che vegn a confessar.
Er tar l'emprima communiun è il prender penetienza in tema. Las plaivs en Svizra na fan strusch pli la confessiun classica en il confessiunal. Anc radund ina terza da las plaivs fan la confessiun singula tar uffants. En blers cas tschernan ils spirituals dentant autras furmas e vias da s'avischinar al tema cun uffants. Alfred Cavelti, il plevon da las Plaivs da Glion, Sagogn, Schluein e Sevgein, fa dapi blers onns il ritual cun il num "la via da la reconciliaziun". Era l'uvestg da Cuira Joseph Maria Bonnemain è in aderent da quai che uffants possian reflectar lur agen agir senza sforz, empè da confessar putgads a moda classica.
