Siglir tar il cuntegn

Header

audio
Halla da spetga en il nagut, en l'exposiziun "Nichts"
Digitale Massarbeit, Museum für Kommunikation
laschar ir. Durada: 57 minutas 1 Secunda.
cuntegn

Viadi en il nagut

«Nichts» è il titel da l'exposiziun actuala dal Museum da la communicaziun a Berna. Po quai esser che gnanc nagut n'è nagut? Uschiglio fiss quella exposiziun bain vida. U ch'i na dess gnanc ella.

Suenter 30 onns sco curatur dal Museum da la communicaziun a Berna è l'exposiziun vegninta la davosa da Kurt Stadelmann. El va en pensiun. Avant che far quai ha el dentant anc realisà in siemi persunal: el ha elavurà in'exposiziun cun il titel «Nichts». Cun quella mussa el ch'il nagut è per il solit ina chaussa d'interpretaziun, che quai po cumpigliar bler umor e ch'il nagut vegn adina definì da ses conturn. Damai ch'il nagut è tut auter che nagut.

L'exposiziun prenda tranter auter sut la marella chaussas che paran mo d'esser nagut. Sco in spazi vid sin ina tastatura. L'effect da placebo. In chastè en l'aria. U ina pausa d'emissiun. «Atgnamain faschain nus in'exposiziun davart insatge che n'exista gnanc. Nagut n'è mai nagut. Gnanc ina rusna n'è nagut. Ella vegn definida da quai ch'è enturn ella», di Kurt Stadelmann, curatur da l'exposiziun «Nichts».

Il nagut n'ha en quest cas da far nagut cun ponderaziuns filosoficas – igl è plitost in'avischinaziun a las pitschnas chaussas dal mintgadi che nus remartgain strusch, perquai ch'ellas èn per exempel invisiblas ubain inudiblas per nus umans.

L'exposiziun en il Museum da la communicaziun mussa però era ch'il nagut po ultra da quai esser collià cun ina tscherta tragica. Per exempel sche umans èn en fugia e stattan davant il nagut. Ubain sche umans han ina malsogna sco per exempel ina depressiun e na sentan nagut pli. «Sch'ins s'occupa propi dal silenzi, da la lungurella, dal nagut, è la schanza gronda ch'ins scuvra la ritgezza dal detagl.» Explorar il nagut – quai fa Vita e cretta per e cun Vus, cun in viadi che po avrir novas portas e mussar novas perspectivas – in viadi en il nagut.

Dapli da «Vita e cretta»

Scrollar a sanestra Scrollar a dretga