Avant intginas emnas ha l'uniun «Kulturraumnetzwerk» avert sias portas a la Sägenstrasse 78 a Cuira per la populaziun. Interessentas ed interessents han pudì dar in sguard en ils differents ateliers e las artistas ed ils artists han preschentà, demonstrà e dà infurmaziuns.
Il center cultural decentral
L'entir project è vegnì mess sin via dal post spezialisà per la cultura da la citad da Cuira. Il settember 2022 ha la populaziun da Cuira ditg cun 55% Gea al preventiv annual da 521'000 francs per construir in center da cultura decentral. L'uniun «Kulturraumnetzwerk Chur» cun in co-presidi da Jen Ries e Rolf Caflisch, che realisescha il project per il post spezialisà, affitta actualmain stanzas en tschintg differents lieus.
- Sägenstrasse - 22 locals
- Rabengasse - 3 locals
- La-Nicca-Strasse - 3 locals
- Grossbruggerweg - 2 locals
- Grünbergstrasse – 17 locals en planisaziun
Rolf Caflisch è co-president da l'uniun e sper quai è el er iniziant da Jazz Cuira e musicist. Per ch'el haja avunda temp per la «Ruumstell», ha el stuì structurar ses mintgadi e definir cleramain, tge dis ch'el s'occupa dal project. Ensemen cun el co-presidiescha Jen Ries l'uniun. Ella lavura daspera sco fotografa e reschissura. Plinavant è Jen Ries l'inizianta dal Polenta7000 ed è actualmain fermamain integrada en la producziun da l'Eurovision Song Contest a Basilea.
Qua na vegn ins betg per lavurar. En la «Ruumstell» vegn ins per crear e stgaffir.
Locals ch'ins po anc affittar
Il mument èn be duas boxas da musica libras, quellas vegnan anc affittadas fin la stad. La pussaivladad da parter l'atelier è giavischada. Perquai stattan a disposiziun er anc trais stanzas a la Sägenstrasse – nua ch'in artist lavura dentant gia.
Local per prender a fit per in curt temp
-
Bild 1 von 2. Salon. Il salon è ina localitad per differentas occurrenzas. Cun in clavazin ed ina buna illuminaziun è il local adattà per diversas provas da musica, teaters u preschentaziuns da films. Bildquelle: Mess a disposiziun.
-
Bild 2 von 2. 5 da 25 commembers dal chor «Klangspektrum Chur» . L'uniun «Klangspektrum Chur» nizzegia il salun mintga mesemna saira per las provas dal chor. L'avantatg da quest local saja ch'ins po reservar el da tut temp e ch'ins na disturbia nagins abitants entras las provas. Bildquelle: RTR.
Sper il salun datti anc ulteriuras localitads per eveniments, sesidas u inscunters, sco per exempel il forum, plirs «multirooms» u in lavuratori ch'è vegnì endrizzà.
Ils locals e las artistas ed ils artists
Art figurativ
-
Bild 1 von 3. Amy Schmid en ses atelier. L'artista Amy Schmid ha 19 onns e frequenta la scola media spezialisada. Daspera fa ella en ses atelier art figurativa. Actualmain creescha ella trais cocons che vegnan a la fin revestgidas cun vatta e pendids si. Bildquelle: RTR.
-
Bild 2 von 3. L'art da Lisa Collomb. Lisa Collomb è oriunda da l'Irlanda ed è vegnida a Cuira avant sis onns. Ella ha lavurà sco architecta fin ch'ella ha chattà ses dun d'art ed ussa sa deditgescha ella cumplainamain a quel. In da ses projects actuals èn raits da saida indiana – las raits vegn ella a fixar en differentas chasas en sia patria. Bildquelle: RTR.
-
Bild 3 von 3. Lavuratori da cheramica. Fabrizio Baumann e Sarah Widmer èn duas da las sis persunas ch'han endrizzà in lavuratori da cheramica. En stanza hai pliras rudellas d'uler, in furnel, ina maisa e regals, nua ch'ins po lavurar e sientar sias creaziuns. Il local è perfetg, damai ch'els han in attatg d'aua ed in attatg d'electricitad ferm per il furnel. Bildquelle: RTR.
Malegiar e dissegnar
-
Bild 1 von 3. Stanza da malegiar. In local per pender si differentas ovras d'art per il di da visita. Normalmain è questa stanza ina stanza da lavurar. Bildquelle: RTR.
-
Bild 2 von 3. Stanza da dissegn. Bildquelle: RTR.
-
Bild 3 von 3. Stanza da malegiar. Salome ed Erich vegnan per il solit la fin d'emna u la saira en lur atelier. Il pèr malegia per savens ensemen. Ina paraid en la stanza è emplenida cun maletgs e skizzas. L'autra è vida e vegn duvrada per malegiar. Bildquelle: RTR.
Musica, teater e film
-
Bild 1 von 3. Leander Albin en ses studio. Il musicist da la Val Lumnezia lavura en la «Ruumstell» per il pli vi da sia musica. Sper la musica experimentescha el cun teater e performance. En ses studio sa chattan instruments da musica, synthesizers, ses laptop ed in canapé. Bildquelle: RTR.
-
Bild 2 von 3. Julian Grünthal, autur e reschissur. Julian Grünthal ha fatg in script per in video. El lavura qua bler vi da ses laptop, ed el porta era mintgatant ses uffants en la «Ruumstell». Bildquelle: RTR.
-
Bild 3 von 3. Jelena Moser vesa sia stanza da lavur sco sia segunda pel. La pedagoga da teater, autura e reschissura lavura per il solit vi da ses laptop sin ina balla da gumma. Vi da la paraid pendan cedels cun ideas, inspiraziuns e regurdanzas. Sch'ella na vegn ina giada betg vinavant stat in canapé cumadaivel en la stanza, il qual ella dovra savens per ponderar u per ruassar. Bildquelle: RTR.
Co vai vinavant cun la «Ruumstell»?
A la Grünbergstrasse 3, en l'anteriur bajetg da la Hengartner Elektronik SA, porscha l'uniun bainbaud 17 novs locals da producziun. Ils blers per bands e musicists, declera il co-president da l'uniun Rolf Caflisch. Actualmain vegnan fatgas lavurs da renovaziun. I po anc cuzzar in onn enfin che las stanzas èn prontas.
Grünbergstrasse 3, nua ch'i dat novas localitads da producziun
En l'avegnir èsi impurtant che nus n'ans concentrain betg mo sin las localitads, mabain che nus construin ina colliaziun tranter las artistas ed ils artists.
Ideas per proxims projects datti anc en abundanza, ma ils daners da la citad da Cuira èn limitads. Perquai vul l'uniun communitgar plans pir cura che quels èn pli concrets. Ins saja dentant regularmain en discurs cun ils proprietaris d'immobiglias, ch'hajan interess da dar a fit lur immobiglia per quest intent.