«Cun l’acziun da rimnar rauba dal mintgadi pon ins far attent al fatg ch’i dat paupradad era tar nus», di Diego Deplazes, il mainafatschenta da la Crusch Cotschna dal Grischun. «En Svizra èn quai var 700’000 persunas. Pia: mintga 12avla persuna è pertutgada.»
Giavischads per l’acziun «2x Nadal» èn products dal mintgadi ch’ins po conservar ditg sco té, café, farina, zutger u buglias da pops. Da l’autra vart èn era giavischads products d’igiena, cunzunt pasta da dents e barschuns da dents.
Il problem sco tal n’è betg schlià cun questa acziun. L’acziun ha duas finamiras: sa gidar al lieu e far attenta la populaziun ch’i dat era tar nus paupradad e che nus stuain agir solidaricamain.
Logisticamain è l’acziun «2x Nadal» ina gronda sfida. Ils pacs cun la rauba vegnan tramessas cun la posta en il center logistic da la Crusch Cotschna Svizra a Wabern en il chantun da Berna. 500 persunas voluntarias avran ils pacs e controlleschan la rauba. Lura vegni zavrà sin fundament dals giavischs dals singuls chantuns. Suenter vegn il material transportà en ils chantuns ed anc ina giada zavrà – en il Grischun da 20 persunas voluntaras – e preparà per las instituziuns socialas localas ch’han dumandà ils products.
Tut la rauba resta en Svizra. Ils daners vegnan transferidas en l’exteriur.
Instituziuns che pon dumandar agid èn servetschs socials, curatellas professiunalas u ils centers da transit. Da questas instituziuns vegnan er ils giavischs per products e la quantitad.