Dals 24 da december fin ils 18 da schaner ha puspè lieu l'acziun «2x Nadal»: Lura prenda la Posta svizra encunter gratuitamain pachets cun mangiativas bain conservablas e products d'igiena per il corp per persunas pertutgadas da la povradad en Svizra. Coop porscha pachets da donaziun gia preparads ch'ins po cumprar e regalar directamain. Ils daners collectads vegnan dabun a projects dal succurs d'enviern da la Crusch Cotschna a l'exteriur.
In'autra pussaivladad è da gidar cun in pachet online sin www.2xweihnachten.ch.
Agid per umans en miseria
L'acziun «2x Nadal» gida umans en povradad en Svizra ed a l'exteriur. En Svizra, nua ch'ina persuna singula viva cun 2'315 francs il mais e famiglias cun 4'050 francs, vegn il preventiv per ils basegns fundamentals sustegnì tras las donaziuns. Distribuids vegnan ils products en l'entira Svizra da la Crusch Cotschna.
Impressiuns da l'onn passà
-
Bild 1 von 3. Crusch Cotschna che sustegna cun ils daners donads persunas basegnusas en Moldavia. Bildquelle: Schweizerisches Rotes Kreuz.
-
Bild 2 von 3. Mangiativas regaladas vegnan preparadas per la spediziun. Bildquelle: Schweizerisches Rotes Kreuz.
-
Bild 3 von 3. Mangiativas regaladas vegnan preparadas per la spediziun. Bildquelle: Schweizerisches Rotes Kreuz.
A l'exteriur sustegnan ils daners projects dal succurs d'enviern en l'Armenia, la Bosnia ed Erzegovina, il Kirghistan e la Moldavia, cun focus sin persunas pli veglias, cun impediments, geniturs sulets e famiglias numerusas. Il sustegn vegn dà en furma da bons per mangiativas ed artitgels d'igiena.
L'onn passà ha l'acziun rimnà 390 tonnas da mangiativas e products d'igiena per la Svizra e 222'000 francs per projects en l'Europa da l'Ost e l'Asia Centrala. Quai ha gidà a 50'000 persunas en miseria.