Far cumissiuns da vivondas, in abunament da bus, in pèr chalzers, ina giacca, regals da Nadal per ils pli chars u ina buna tschaina per l'entira famiglia, per ils blers da nus chaussas quotidianas che sa chapeschan quasi da sasez. Mo er en il Grischun datti persunas che na pon betg prestar quai pervia da lur situaziun da viver. Quellas e quels pon sa drizzar a «l'anghel da Nadal» – in'acziun d'agid da l'Uniun catolica da dunnas dal Grischun.
Er en il Grischun datti persunas che dovran sustegn.
I funcziuna fitg simpel, declera Irmgard Cavigelli ch'è gia bun diesch onns responsabla per l'acziun. Tgi che dovra sustegn, scriva ina brev u ina carta e descriva la situaziun da viver actuala e tge basegn d’agid ch’el u ella ha. Indicaziuns sco num, vegliadetgna, adressa e numer da telefon na dastgan betg mancar. Las brevs pon ins trametter cun la posta u directamain bittar en la stgaffa da brevs tar l'anghel da lain en la via da la posta a Cuira.
Or da las brevs che rivan tar «l'anghel da Nadal»
-
Bild 1 von 6. Bildquelle: RTR.
-
Bild 2 von 6. Bildquelle: RTR.
-
Bild 3 von 6. Bildquelle: RTR.
-
Bild 4 von 6. Bildquelle: RTR.
-
Bild 5 von 6. Bildquelle: RTR.
-
Bild 6 von 6. Bildquelle: RTR.
Impurtant è ch'ins na scriva betg in mail mabain ina brev cun la dumonda per sustegn.
Trais giadas il december s'entaupa Irmgard Cavigelli cun sias collegas da l'Uniun catolica da dunnas dal Grischun per leger las brevs e decider co ed en tge furma ch'ellas pon sustegnair las persunas che han dumandà agid. Mintga brev vegn prelegida ed alura decidan las quatter dunnas ensemen. Per tegnair la survista han ellas ina glista sin il computer che vegn mintgamai er gist actualisada. Là han ellas indicaziuns sco il num, il numer da telefon, infurmaziuns davart la situaziun persunala e cura che la persuna ha dumandà agid.
La protecziun da datas è fitg impurtanta, uschia avain nus la glista sin in computer senza access a l'internet.
I saja fitg different tgi che dumondia agid, di Irmgard Cavigelli: dunnas che sajan sulettas cun uffants, famiglias grondas, persunas ch'èn sulettas, persunas a l'ur da la societad che dumondian sustegn. Inqual che dovra agid è bain enconuschent tar Irmgard Cavigelli e sias collegas, perquai ch'i vegn adina puspè ina brev cun la dumonda per sustegn. Surtut sajan quai famiglias che dumondian l'emprima giada agid cura ch'ils uffants sajan anc pitschens e quai giaja magari sur ils onns enavant cun il sustegn.
I dat persunas nua che la brev tutga simplamain vitiers mintg'onn.
Gidà na vegn betg cun raps bluts, mabain en furma da bons da cumprar per grossists enconuschents u per ina stizun cun vestgadira u là nua che las persunas pon cumprar quai ch'ellas dovran gist. Finanzià vegn quai cun donaziuns. Mintg'onn vegnan uschia ensemen circa 18'000 francs che Irmgard Cavigelli e sias collegas pon dar enavant ed uschia reparter in zic glisch en il temp d'advent e Nadal.