En la sala dal Titthof a Cuira na datti betg mo ils stans dal martgà da Nadal, mabain era maisas decoradas a moda festiva nua che la cliantella dal bazar po seser, mangiar gentar e star da cumpagnia.
En la cuschina prepara entant in team da dunnas schuppa da giutta e tartuffels cun charniez. La squadra da cuschina consista d'en tut 7 dunnas – ina d'ellas è Fränzi Tanner. Per ella ha il di cumenzà gia da bun'ura a las 06:00. Il pli bel vi dal bazar saja tenor Fränzi Tanner da vesair che las collegas vegnan gia uschè baud cun grond plascher a gidar. Ellas hajan ellas er adina legher ensemen.
L'emna avant il bazar saja la fasa la pli intensiva per las organisaturas. Era la presidenta da l'uniun, Edith Gartmann-Cantieni, saja mintgamai cuntenta cura ch'il bazar ha finalmain lieu ed ella po giudair il temp d'advent.
Al martgà da Nadal avain in'autra cliantella che a noss bazar. Ils passants èn per il pli giuvens.
Ma era suenter il bazar n'è la vendita dals products anc betg a fin. Tut quai che resta enavos, vegnia vendì al martgà da Nadal a Cuira la fin d'emna suandanta. Uschia hajan ins la pussaivladad da vender anc dapli ed cunzunt er ad in'autra clientella.
Per mai è il temp d'advent il pli bel temp da l'onn.
Quest onn ha l'Uniun catolica da dunnas decidì da sustegnair cun il guadogn dal bazar l'organisaziun «Maisha Tanzania» – in'organisaziun che sustegna il provediment da sanadat a Rhotia, en la Tansania, ed è vegnida fundada da la Grischuna, Corina Cabalzar. Cun in referat per la Baselgia catolica grischuna haja Corina Cabalzar persvas las dunnas suprestantas da Cuira da sia lavur. «Maisha Tanzania» survegnia perquai la mesadad dals raps che vegnan rimnads durant il bazar. Corina Cabalzar è enorm grata per il sustegn per sia organisaziun:
Cun il sustegn finanzial pudain per exempel realisar novas rampas als ospitals per ch'ils pazients pon arrivar meglier.
La segunda part dals raps ch'il bazar rimna giajan a l'acziun «Chascha da brevs da Nadal». Là pon persunas, ch'èn pertutgadas da la povradad, inserir lur giavischs da Nadal. Quels emprova l'Uniun catolica da dunnas dal Grischun lura d'accumplir tenor pussaivladad.