Alfredo Wolf, savens pli enconuschent sco «Lupo» Wolf è oriundamain da Samedan. Dentant ha el decidì en la vegliadetgna da sis onns dad ir a star tar la famiglia Ronchi a Schlarigna.
Quai era causa ch’el na sa sentiva betg bain en l’atgna famiglia. La premissa dals geniturs era dentant, ch’el stoppia ir a scola a Samedan, sa regorda l’um da 71 onns.
Nagin'amur en famiglia
Daco che la relaziun cun ses geniturs e la sora n’era betg buna e cordiala, po Alfredo Lupo Wolf entant declerar meglier. Avant intgins onns ha el numnadamain realisà tras in’emissiun da televisiun davart ina chasa d'uffants a Lai, ch’el na deriva betg da la famiglia Wolf, mabain ch’el è vegnì adoptà
Fin là n’avev jau nagins indizis che jau fiss adoptà.
Danunder ch’el deriva oriundamain, n’haja el betg chattà or, ils documents n’existian betg pli. Ch’el sappia dentant viver bain er senza avair dapli respostas, uschè l’um da statura stiglia sportiva, cun chavels blonds ondulads ed egls blaus.
Onns intensivs da rebelliun
Gugent fiss Alfredo Lupo Wolf daventà pilot. Quai n’hajan ils geniturs dentant betg lubì e sfurzà el da far in emprendissadi sin banca. Silsuenter haja el cumenzà da rebellar.
Quai era in temp da festa, rock’n’roll e da marihuana. Jau n’hai laschà ora nagut. Quai era er ina rebelliun cunter mes geniturs.
Ils onns da rebelliun hajan durà enfin ch’el è puspè turnà en Engiadina, nua ch’el ha lavurà l’emprim en ina firma da transports, er sco camiunist.
Dapi plirs decennis maina il magister da skis patentà in’atgna agentura per ils pli differents eveniments en val. Tranter auter era faschond sez moderaziuns da las cursas da chavals sin il lai schelà da San Murezzan u organisond nozzas en Engiadina. Las pli exclusivas, sajan stadas duas per clientella da l'India.