Il sport da skijöring nua che skiunzas e skiunz sa laschan trair d’in chaval scriva ina lung’istorgia. Avant passa 115 onns è quella disciplina vegnida inventada a San Murezzan e tutga sco punct fix en il program dal White Turf – las cursas da chaval tradiziunalas sin il lai schelà da San Murezzan. Las participantas ed ils participants daventan però adina pli vegls. Da chattar giuvnas e giuvens che vegnan suenter, saja problematic, di Alfredo Lupo Wolf.
Di da famiglia per motivar
Per prender per mauns quel problem, è vegnì lantschà il di da famiglia. Las trais sondas avant il grond White Turf, survegnan uffants e giuvenils la pussaivladad dad ir a sella ubain da pruvar or e sa cumbatter en la disciplina da skijöring. La dumonda saja gronda tenor Lupo Wolf. Numnadamain dettia quai gia ina glista da spetg per las proximas duas sondas. Be cun il di da famiglia na saja il problem però betg schlià. Perquai vul ins stgaffir ulteriurs eveniments per uffants e giuvenils er durant la stad.
