Andi Seeli oriund da Vuorz vala sco ina vaira icona en la scena da mountainbike. Ils onns otganta ha el, ensemen cun dus buns amis, fundà il Club da Velo Surselva, in club da renum nua che er Nino Schurter u Vital Albin fan part. Durant quest temp, avant bun 40 onns, ha Seeli gì ulteriurs mandats en il sectur da sport ed è er stà trenader persunal da divers atlets da classa.
Jau sun losch sche jau vegn titulà sco mister mountainbike er sche jau na dun betg bler paisa sin quest titel, ma i fa plaschair. Gronda renconuschientscha hai jau cunzunt en l’exteriur.
A la fin dals onns otganta ha el pudì trenar durant dus onns l’equipa naziunala dals juniors da velo da cursa. Il 1992 è il Sursilvan daventà trenader naziunal dals mountainbikers, tranter auter er da la legenda Thomas Frischknecht. Durant quest decenni han ils Svizzers festivà gronds success e quasi adina terminà la stagiun sco naziun numer 1 dal mund. Seeli ha dentant er gì il pensum da bajegiar si novas structuras en Svizra. Quai ha el fatg cun grond success.
Swisspower Cup – l'ovra da la vita
Nagin ha influenzà il sport da cursa e cunzunt promovì ils giuvens uschè fitg sco Andi Seeli. In onn marcant en sia vita è il 1994. Avant passa 30 onns ha Seeli clamà en vita il «Swisspower Cup», ina seria da cursas da mountainbike, oz enconuschenta sut il num «Swiss Bike Cup», ch’auda er 30 onns pli tard tar ina da las pli popularas ed impurtantas serias da cursas dal mund suenter quella da la Cuppa mundiala.
Cun questa seria el ha cunzunt er vulì promover ils uffants e giuvenils. Ses concept è però cunzunt stà ch’ils giuvens treneschan dapli la tecnica e l'inschign enstagl da pedalar kilometers per trenar be la cundiziun. Envers sia idea hai uschia er dà bain intginas vuschs criticas. Mo Andi Seeli ha dà la resposta cun il success. Ils Svizzers èn daventads ils megliers mountainbikers dal mund, cunzunt tecnicamain.
Jau ma regord fitg bain da mes emprim mountainbike e da mia emprima tura gist sur il Pass Pigniu. Deplorablamain è la rama dal bike rutta sin questa tura.
Il 2002 ha il mister mountainbike da Vuorz fundà il «Swisspower MTB Team», l’equipa da profis ch’auda oz a ses bun ami Thomas Frischknecht. En quest team ha cunzunt Nino Schurter passentà sia entira carriera. Andi Seeli ha accumpagnà sur onns il mountainbiker da Tersnaus ch’è daventà in star, il meglier mountainbiker dal mund. E Seeli e Schurter èn er restads dasper la scena da mountainbike buns amis.