Il di suenter la derniera
Il grond tema da la fin d'emna da la cuppa mundiala a Lai è stà la davosa cursa da Nino Schurter. Cun il Grischun da 39 onns ha il pli grond ciclist da cross-country da tut il temp terminà sia carriera. Arrivà è Nino Schurter sco 24avel.
En il decurs da sia carriera professiunala da 18 onns ha Schurter cuntanschì in set da medaglias olimpicas cumplet e gudagnà betg main che 10 titels singuls da campiunadis mundials. Vitiers datti trais giadas aur mundial en la staffetta mixed. Nov giadas ha el gudagnà il classament general da la cuppa mundiala. Tranter auter grazia a 36 victorias en cursas singulas.
Ils mountainbikers e las mountainbikeras han la fin d'emna passada per l'ultima giada questa stagiun dà en las pedalas e quai en las cursas da short track e cross country a Lai. Per l'ultima giada insumma a la partenza è stà Nino Schurter, il biker da Tersnaus ha terminà dumengia sia carriera da profi.
Cun victorias e resultats da podest n'èsi gia ordavant betg pli stà da quintar tar Nino Schurter. Gia tar ses ultim short track in'emna avant n'è il Lumnezian betg ì al limit ed è sa laschà celebrar dal public.
Andi Seeli: anteriur trenader e pitga dal success da Nino Schurter
In mument emoziunal è questa fin d'emna er stada per Andi Seeli. L'um dad oz 67 onns vala sco «mister mountainbike» ed è in dals pioniers da la promoziun da quest sport en Svizra. Sco in dals emprims trenaders ha el er gì ina grond'influenza sin la carriera da Nino Schurter. Fin oz collia els dus ina ferm'amicizia.
Il traject è tecnicamain stà pretensius ed intensiv, uschia ch'ina buna posiziun da partenza è decisiva, di Andi Seeli. L'emprim vai in toc ensi e suenter sin in single-trail nua ch'ins stoppia esser davanttiers. Tgi che croda qua enavos ha difficultads da puspè prender suenter.
Per il matador local Nino Schurter è il percurs a Lai ina cursa da chasa cun ina muntada speziala: Qua è el daventà campiun mundial il 2018, ed il sustegn dals numerus fans svizzers per lung dal traject procura mintg'onn per in'atmosfera unica. Tenor Andi Seeli èsi gist quest avantatg da chasa e la famigliaritad cun mintga meter dal traject che po far ina differenza per las curriduras ed ils curridurs svizzers.
Ina carriera d'aur va a fin
El è creschì si a Tersnaus ed è daventà in dals sportists cun il pli grond success insumma. Nino Schurter ha cuntanschì tut quai ch'ins po cuntanscher en il sport da mountainbike. En sia carriera impressiunanta ha Schurter gudagnà trais medaglias olimpicas, è daventà 10 giadas campiun mundial ed ha festivà en tut 36 victorias da la cuppa mundiala. El è il mountainbiker ch'ha gì il pli grond success insumma.
Cun 39 onns terminescha Nino Schurter sia carriera e quai cun l'ultima cursa da la cuppa mundiala da questa stagiun che ha lieu a Lai. Uschia po el prender cumià dals fans da bike sin las sendas da Lai nua ch'el sa senta da chasa.
Alessandra Keller gudogna il cross-country – Ginia Caluori daventa 20avla
Premiera a la cuppa mundiala da mountainbike a Lai: per l'emprima giada insumma gudogna ina Svizra la cursa da cross-country, quai grazia ad Alessandra Keller. La mountainbikera dal chantun Sutsilvania ha gudagnà davant ils fans da chasa avant la campiunessa mundiala Jenny Rissveds da la Svezia e l'Americana Savilia Blunk. In grond success è quai era per l'equipa svizra da Thömus cun lur schef d'equipa Ralph Näf.
Cun Jolanda Neff è anc ina segunda Svizra classada sut las top 10. La campiunessa olimpica da Tokio è vegnida 10avla ed uschia classada gist avant Ronja Blöchlinger e Sina Frei.
La Grischuna Ginia Caluori ha terminà la cursa sco 20avla davos Linda Indergand ch'è stada oz, sco Nino Schurter, per l'ultima giada a la partenza d'ina cursa da la cuppa mundiala. Er ella terminescha sia carriera a Lai.
E per Ginia Caluori vai ussa vinavant al campiunadi mundial da velo da via. Anc la dumengia saira è ella sgulada a Ruanda. Sia cursa da via è lura in'emna pli tard.
Cross-country U23: Solèr e Hutter manchentan plaz sut las top 20
Suenter las bunas prestaziuns al campiunadi mundial avant in’emna a Crans-Montana n’èsi betg ì sco giavischà per las Grischunas Chiara Solèr ed Anina Hutter a la cursa da la cuppa mundiala a Lai. Omaduas han manchentà in plaz sut las top 20 en la categoria U23.
La Lumneziana Chiara Solèr è vegnida 22avla (+5:40 min.), Anina Hutter da Trimmis, quarta al campiunadi mundial, ha stuì sa cuntentar cun il 25avel plaz (+6:37 min.).
Gudagnà la cursa ha l’Americana Vida Lopez de San Roman avant las duas Talianas Valentina Corvi e Sara Cortinovis. Meglra Svizra è stada Elina Benoit sco 8avla.
Short track U23: Chiara Solèr vegn 20avla
Gia gì lur cursa han las dunnas sut 23 onns nua che Chiara Solèr da Lumbrein è vegnida 20avla gist avant Anina Hutter da Trimmis, la campiunessa svizra en questa disciplina tar las dunnas U23.
Gudagnà la cursa ha la Taliana Valentina Corvi. Tar ils umens sut 23 onns ha gudagnà la cursa da short track il Svizzer Finn Treudler ch'è vegnì la dumengia passada a Crans-Montana campiun mundial da cross-country.