Sias ragischs sajan Domat, raquinta Andri Jörger cun fieu e flomma. Uschia è el stà prest 30 onns en la suprastanza da la vischnanca burgaisa. In engaschament politic na saja dentant mai stà in tema per el. Memia pauc flexibel e spert saja il process politic.
En la vischnanca burgaisa hajan els dentant adina pudì realisar spert projects e quai a favur dals abitants da Domat. Ses engaschament per la vischnanca mussa era ch'el è stà cumandant dals pumpiers e ch'el è s'engaschà en autras uniuns e per events da sport.
Golf la lavur, lutga l'amur
La lutga haja gia adina fascinà Andri Jörger. Activ na saja el dentant mai stà, perquai ch'il dies ha fatg problems. S'enriclà na saja el dentant mai da quai. Uschia è el s'engascha davos las culissas, è stà en ils comités d'organisaziun da las festas da lutga grischun glarunaisas. E natiralmain accumpogna el ses dus figls a las festas.
La lutga um cunter um fascinescha adina puspè.
Ed era questa giada è in da ses figls ad ina festa federala ed Andri Jörger sa chapescha sin tribuna cun passa 50'000 autras persunas.
Avant 30 onns è l'um d'ussa 58 onns stà l'emprim greenkeeper da la plazza da golf da Domat. Era sch'el avess gugent fatg il pur, la professiun ch'el ha emprendì, saja il job da greenkeeper stà in grond cletg e surtut ina gronda casualitad.
U sco el di cun in surrir: «Il dretg u er il fauss mument al dretg lieu.» Tranter il golf e la lutga dettia paucas parallelas, raquinta Jörger en il Profil. El saja simplamain interessà en sport general.