Anita Simeon Lutz ha er auters interess che l'architectura. Ella è ina da las fundaturas ed organisescha las emnas da design Turitg. Sia incumbensa principala dentant è il mument la lavur sco schefredactura da la revista dals samaritans svizzers. Ditg è ella er stada organisatura dals Dis da litteratura rumantschs. Il motiv ch'ella è sa retratga ha er da far cun il destin da ses um. Avant 10 onns è el mort sieva d'ina malsogna maligna.
En la pli nova ediziun da la «Revista digl noss Sulom» scriva Anita Simeon Lutz en moda fitg personala l’istoria da sia famiglia, da ses um ch’è mort da cancer, ma surtut da lur amur ch’ha cumenzà cun ina plattafurma digitala da contact. Ses fazit: «La vita è e resta analoga.»
Sin la tschertga d'architectura interessanta
En las muntognas Grischunas sa chattan bleras perlas architectonicas. En la seria «Portas avertas» avran l’experta d’architectura Anita Simeon Lutz ed il moderatur Livio Chistell las portas da chasas extraordinarias.
Il duo fa in viadi tras il Grischun e visita differentas chasas: cun furmas curaschusas, modernas e tradiziunalas cumbinadas cun bler artisanadi. En trais episodas visitan els sis chasas: ina renovaziun massiva a Claustra, in chalet da vaider ad Alvagni, ina chasa dispitaivla da low-tech ad Igis, in refugi modern a Vignogn, in monument malchapì da betun ad Ardez ed in giuvel crappus a Malögia.