Siglir tar il cuntegn

Header

audio
Annina Sedlacek: «En Svizra pon ins viver bain da l’art»
Or da Profil dals 20.01.2024. Maletg: RTR
laschar ir. Durada: 57 minutas.
cuntegn

Annina Sedlacek «En Svizra pon ins viver bain da l’art»

L’Engiadinaisa lavura dapi 20 onns sco actura libra en ils pli differents lieus, ultimamain era cun ina rolla en la seria «L’ultim Rumantsch».

La tribuna è il dachasa dad Annina Sedlacek. L’Engiadinaisa da 43 onns lavura dapi bun 20 onns sco actura libra, docenta ed artista. Scuvrì quella giada ses talent e recumandà ad ella da far la scola da teater Dimitri ha in cussegliader da professiun. Entant tutga il «viver or da la valischa» tar il mintgadi dad Annina Sedlacek, cunquai ch’ella lavura en ils pli differents lieus, surtut en Svizra. Ses dachasa è actualmain a Locarno en il chantun Tessin, nua ch’ella abita cun ses partenari.

Per mai èsi fundamental d’avair in bel dachasa privà. Cunquai che jau viagesch bler e dorm er adina puspè en in auter letg, dovr jau suenter in refugi nua che jau stun era bain.
Autur: Annina Sedlacek actura libra ch'abitescha a Locarno

Ils engaschaments dad Annina Sedlacek èn fitg differents. Uschia lavura ella era sco docenta en scolas, sco actura sin tribunas u en films. Ultimamain ha ella surpiglià ina rolla en la seria rumantscha da RTR «L’ultim Rumantsch»: ina lavur in pau autra, per part pli tecnica, di l’Engiadinaisa.

Per represchentaziuns sin tribuna exercitain e glimain nus fin sis emnas ordavant. Per ina producziun da film hai jau in curt text e quel è da repeter tut tenor in entir di.
Autur: Annina Sedlacek gioga ina rolla en «L'ultim Rumantsch»

Ina segirezza finanziala absoluta n’haja ella betg, admetta Annina Sedlacek. Ella n’enconuschia quai era betg auter. Impurtant saja dentant d’avair ina gronda disciplina quai che reguarda l'administraziun.

Annina Sedlacek
Legenda: Mess a disposiziun

Plans da turnar en patria

Suenter che ses partenari ha finì il «Master» a l’Academia Dimitri, vul Annina Sedlacek puspè turnar a Sent en sia patria. La rait sociala e la vischinanza da la famiglia, quai sajan ils motivs per questas ponderaziuns. Per quant ditg ch'ella vegnia a restar en Engiadina na possia ella betg dir. Quai dependia adina era da la lavur.

RTR Profil 09:00

Artitgels legids il pli savens