1. Per tge vai en la seria? En il center stat la famiglia Durisch, proprietaria e gestiunaria da la pli gronda chasa da medias dal Grischun. Cur ch'il patrun e fundatur Gion-Peder (Elmar Deflorin) mora, rumpa ora in cumbat da pussanza en la famiglia tranter il figl Gion (Marco Luca Castelli) e la biadia Ladina (Annina Hunziker). Ella duai numnadamain manar l'ultima gasetta rumantscha «Posta». Ma bainprest sa chatta ella en ina palì plain intrigas e cumbats da pussanza.
En il center da la segunda stafla da «L’ultim Rumantsch» stattan vinavant las dispitas da la famiglia Durisch. Gion zuppenta ils problems finanzials da la chasa da medias entant che sia nezza Ladina publitgescha artitgels che mussan praticas dubiusas da famiglias grischunas. Andrietta (Marietta Jemmi), la mamma da Ladina emprova d’in maun da salvar il num da la fatschenta da famiglia e da l’autra vart er da carmalar enavos en il manaschi sia figlia.
Pervia dal management mal da Gion vegn l’entira fatschenta en ina situaziun precara. In conglomerat da medias ester smanatscha da surpigliar la chasa da medias pervia dals problems finanzials. Gion ed Andrietta èn occupads cun il manaschi durant che Ladina scuvra in secret da famiglia. Ensemen cun Corsin (Noam Jenal) ch’è stà schefredactur da la «Posta», cumenza ella a far retschertgas che mainan els enfin a Genua.
2. Vegn discurrì be rumantsch en la seria «L'ultim Rumantsch»? Betg exclusivamain. La seria reflectescha la realitad da bleras Rumantschas e Rumantschs – gist er en la diaspora – nua ch'ellas ed els sa movan mintga di tranter differents munds linguistics. Sper ils differents idioms rumantschs, inclusiv las differentas colurs ed atgnadads, vegni er discurrì en la seria tudestg. «L'ultim Rumantsch» vegn mussà cun suttitels tudestgs.
3. I para che l'istorgia da la famiglia d'editurs Durisch fiss inspirada da la famiglia Lebrument che maina la chasa da medias Somedia. È quai vair? En il mument dal svilup n'èn ni la famiglia Lebrument ni la Somedia stadas tema ni exempel. Che la famiglia Durisch ha aspects cuminaivels cun la famiglia Lebrument, ha da far cun la realitad en la societad. In sguard en autras chasas da medias mussa che savens in um ha bajegià si in imperi da medias ed ha lura manà quel sco patrun. Cunquai che nus vulain raquintar ina istorgia autentica essan nus s'orientads a quella realitad.
4. Nua è quella seria vegnida filmada? Las lavurs da filmar da l'emprima stafla han gì lieu en la chapitala grischuna Cuira e conturn, en la Val Müstair (Lü) ed a Turitg. La segunda stafla è vegnida filmada a Cuira, Bravuogn ed a Genua.
Cun in clic: guardar l'emprima stafla
5. Tgi èn las acturas ed ils acturs da la seria? En las rollas principalas da la seria en da vesair Annina Hunziker sco Ladina e Marietta Jemmi sco mamma Andrietta Cadonau. Marco Luca Castelli gioga Gion Durisch e Noam Jenal il schefredactur da la «Posta» Corsin. En la segunda stafla èn ultra da quai da vesair Felicitas Heyerick sco Regina, Andreetta Nogler sco Frida Bonifazi u Catriona Guggenbühl sco dunna Brunner.
6. Cun tgi ha RTR producì «L'ultim Rumantsch»? La seria è vegnida producida da Sophie Toth ed Aminta Iseppi da shining nice da Turitg en coproducziun cun Manuel Sieber da schau. GmbH da Cuira. Reschia ha Adrian Perez manà cun la camera dad Aaron Markus Graf. Ils scenaris èn vegnids sviluppads en il Writer's Room dals auturs Adrian Perez, Jen Ries e Simon Nagel.
7. Pertge producescha Radiotelevisiun Svizra Rumantscha (RTR) ina seria fictiva? Films e serias èn observaturs impurtants da la societad. L'incumbensa dal film è da raquintar istorgias, da svegliar emoziuns e da guardar il mund or da novas perspectivas. In bun film po reflectar la societad, svegliar dumondas e provocar da reflectar davart l'atgna vita e davart il mund.