Ils 25 da settember 1945 è naschì a Mustér Simon Camartin. Là ha el frequentà la scola populara. En il gimnasi da la scola claustrala ha el giudì uras da violina tar il pader Pankraz. Er pader Flurin Maissen ha dà vinavant a Simon l'euforia per la musica, in'euforia ch'il giubilar ha mantegnì fin oz. Ensemen cun ses frar Iso (24.03.1944) ha el er sunà quartet ensemen cun pader Pankraz e pader Anselm.
Suenter ses studi da biologia a Basilea è el returnà en patria sco magister a la scola claustrala a Mustér. Er politicamain è Simon Camartin s'engaschà (president communal, deputà Cussegl grond). Ed avant bun 30 onns è el sa decidì da sa deditgar cumplainamain a quella passiun che ha accumpagnà el dapi si'uffanza: La musica.
Sco dirigent ha el er purtà la musica grischuna e svizra viadora en il grond mund e la musica dal grond mund qua tar nus. Igl è adina stà in grond desideri dad el da far pli enconuschenta la musica grischuna tar interpretas ed interprets, instituziuns u festivals. Ed el ha adina promovì giuvens talents da musica.
Cun sia chasa editura Sordino ha el derasà ovras contemporanas da cumponistas e cumponists indigens ed esters. Dus exempels: «Tezlas» e «Salip e la furmicla».
Ed uss pren el in zic pli pacific, s'engascha dentant anc adina cun grond gust e plaschair per musica sinfonica ed ha era anc diversas ideas ch'el vuless gugent realisar, er ensemen cun sia dunna Oana ch'è violinista.