Dapi prest 30 onns exista l’Archiv cultural da dunnas dal Grischun. El è vegnì fundà e quai per necessitad. Relaschs da dunnas, istorgias da dunnas, documents da dunnas e d’organisaziuns da dunnas vegnivan savens bittads davent. Tals documents na parevan betg degns da vegnir archivads. In fatg che ha motivà l'istoricra Silke Margherita Redolfi e la schurnalista Silvia Hofmann-Conrad da fundar in archiv da dunnas per il Grischun.
Archiv cultural da dunnas dal Grischun
-
Bild 1 von 5. Silke Margherita Redolfi e Silvia Hofmann-Conrad. Las fundaturas e manadras dal Archiv cultural da dunnas dal Grischun 1997 – 2008. Dapi il 2008 maina Silke Redolfi suletta l’archiv . Bildquelle: RTR.
-
Bild 2 von 5. Silke Margherita Redolfi. Grazia a l'agid da bleras gidantras e gidanters èsi per la istoricra Silke Redolfi pussaivel da manar persula il Archiv cultural da dunnas dal Grischun. Bildquelle: Menga Huonder-Jenna.
-
Bild 3 von 5. Fraubünden. In term impurtant per l'Archiv cultural da dunnas è stà la publicaziun dals quatter toms «Fraubünden». Ils cudeschs cun l’istorgia da las dunnas e da las schlattainas valan anc oz sco ovras da standard. Bildquelle: Menga Huonder-Jenny.
-
Bild 4 von 5. In lieu d’inscunter. En las localitads da l'Archiv da dunnas han adina puspè occurrenzas lieu. Qua preschenta Antonetta Battaglia-Janutin ses cudesch «Ein Goldesel wäre mir lieber gewesen». Bildquelle: Menga Huonder-Jenny.
-
Bild 5 von 5. Il vegl dachasa. 17 onns è l’Archiv cultural da dunnas dal Grischun stà dachasa en la Goldgasse 10. Il nov dachasa sa chatta en la Untere Gasse 26. Bildquelle: Menga Huonder-Jenny.
Stgazis
In dals stgazis impurtants da l'Archiv cultural da dunnas è il relasch da l'architecta enconuschenta Monica Brügger. Ella ha studegià a l’ETH ed è stada l’emprima architecta grischuna cun in agen biro d’architectura. En ina branscha dominada dad umens ha ella gì ils onns 70 ed 80 ina greva posiziun. Uss sa chatta sia ovra cumpletta cun plans da ses bajetgs en ils tschalers climatisads da l'Archiv cultural da dunnas.
Preschenta en l'archiv è era la regina dal pitg da crusch Elly Koch. Deplorablamain mo cun ina box. Bler da sias truvaglias persunalas èn vegnidas bittadas davent.
Novs documents
Survegnir in relasch d’ina dunna che viva anc, quai è per l’Archiv cultural da dunnas in cas da fortuna. In tal cas è il relasch da la collavuratura da medias Maria Cadruvi, ina da las emprimas dunnas en las medias grischunas. Ella ha decidì da surlaschar ses documents a l'Archiv cultural da dunnas dal Grischun. Ses documents cumpiglian texts, publicaziuns, cudeschs, fotografias, dentant era posta dad auditurs ed audituras ed objects persunals.
Archivar per duvrar
Tut ils documents da l'Archiv cultural da dunnas stattan a disposiziun per retschertgas. Uschia per exempel chatta la scienziada da litteratura Viola Cadruvi il material ch’ella dovra per ina retscha da prelecziuns a l'institut rumantsch da l’Universitad da Turitg davart la scriventa e schurnalista Imelda Coray-Monn. L'Archiv cultural da dunnas conserva 12 boxas d’archiv da la scriventa ch’è morta il 2009.
Biografias femininas
Ina purschida speziala da l'Archiv cultural da dunnas dal Grischun èn ils curs per dunnas da scriver lur atgna biografia. Antonetta Battaglia-Janutin da Riom ha frequentà in tal curs, è quai cun success. Sia biografia è uss vegnida edida en l'emprim cudesch da la chasa editura da l'Archiv da dunnas. En il cudesch cun il titel «Ein Goldesel wäre mir lieber gewesen», raquinta la dunna da Riom da sia uffanza, dal temp da giuventetgna e sia confruntaziun cun il plevon che na leva betg ch’ella maridia in refurmà.
Nov da chasa
Ils davos 17 onns è l’Archiv cultural da dunnas dal Grischun stà da chasa en il martgà vegl da Cuira, en la Goldgasse 10. Suenter la disditga hai gì num chattar in nov dachasa e quel han Silke Margherita Redolfi e sias gidantras chattà e quai en la Untere Gasse 26, las anteriuras localitads da la fatschenta da cristals Membrini. L’avertura è stada il prim d'avrigl.