N’è Nadal betg ina da las festas la pli nostalgicas da l’onn? N’èsi betg en questa perioda da l’onn spezialmain bel da mangiar ils creflis fatgs tenor il recept da la tatta, da guardar films preferi ch’ins enconuscha quasi ordador, dad udir istorgias da pli baud, da repeter rituals e chanzuns che regalan ad ins quest sentiment da «turnar a chasa»?
Quest’emissiun speziala vul nutrir precisamain quest sentiment e sa cumpona da perlas festivas or da l’archiv dad RTR, da chanzuns da Nadal rumantschas (forsa da quellas bunamain emblidadas or da spir «Jingle Bells» e Mariah Carey dapertut), e lura dad ina u l’autra poesia da Nadal:
Tschiel, pertgei oz a mi paras Pli sereins ch’ils auters dis? Biala glina, steilas claras, Oz pertgei pli dultsch sclaris?
D’udir en quest’emissiun è era in pled sin via da Flurina Cavegn-Tomaschett, collavuratura pastorala en la plaiv da Glion e conturn. Ella è sa dumandada tge ch’il pled NADAL cuntegn ozendi insumma anc:
Per ils ins vegn quai ad esser il pignol decorà, il regalar pachets e la «fondue chinoise». Auters na vulessan betg desister dal chantar ubain dal servetsch divin en baselgia. E tge cuntegn dun JAU a Nadal? Questa dumonda ha fatschentà mai ils ultims dis!