Tgi che sa lascha gugent inspirar, sa maschaida gugent en la fulla dal public u giauda gugent in teater ha la schelta tranter ina retscha d’occurrenzas culturalas ch’han lieu questa stad en Grischun.
11 da matg fin october: Ovras temprivas dad Alois Carigiet e Matias Spescha
In ha stuì bandunar Trun vers Turitg per daventar artist, l'auter ha stuì turnar da Turitg puspè en la patria per sa concentrar sin la via sco artist. Matias Spescha ed Alois Carigiet – omadus cun fermas ragischs Sursilvanas.
5 e 6 da zercladur: Buskers Chur
«Busker» è englais e munta tant sco musicist u musicista da via. A la festa «Buskers» en la chapitala grischuna na datti però betg be d’udir musica, mabain er da vesair acrobatica, teater u comedy. Gia per la 11avla giada s’emplainan las vias e giassas da la citad veglia da Cuira a chaschun dal spectacul d’art internaziunal cun fullas da persunas. Ins po visitar il festival senza stuair cumprar in bigliet. Per finanziar l’entira occurrenza vendan ils organisaturs però bratschlets. Sper las preschentaziuns artisticas datti numerus stans cun da baiver e da mangiar.
7 da zercladur: «Der Kraftwerkbau im Safiental»
Il Museum Stussavgia Plaz deditgescha ina exposiziun speziala a la construcziun d'ovras electricas en la Val Stussavgia ils onns 1950 e mussa las consequenzas socialas ed economicas da la construcziun da l'ovra electrica.
12 da zercladur: Festival Origen
Sco mintg'onn organisescha e mussa la Nova Fundaziun Origen numerusas preschentaziuns. La stad tutga a l'antica romana cun ses mitus arcaics, sias legendas fantasticas, ses munds tschessads.
18 fin 21 da zercladur: Scuol Classics: Carmina Burana
Carmina Burana da Carl Orff resuna en l'Engiadina Bassa cun il Golden Gate Symphony Orchestra: Radund 130–150 musicistas e musicists dal Grischun, San Francisco e da l'Asia furman sut Urs Leonhardt Steiner ina gronda punt musicala – unidas tras la lingua da la musica.
25 fin 28 da zercladur: Grin Festival
Il Grin Festival a Roveredo è vegnì fundà per reunir arts e culturas da tut il mund e per render visibla la diversitad da tradiziuns folcloristicas. El s'engascha per l'avertadad culturala, la reducziun da pregiudizis sco er per la toleranza, la solidaritad e la pasch.
2 fin 26 da fanadur: Festival da Jazz
Il Festival da Jazz San Murezzan tutga tar las occurrenzas da jazz las pli enconuschentas da la Svizra e preschenta mintg'onn in program multifar en in'atmosfera extraordinaria. Grondezzas internaziunalas dal jazz s'inscuntran cun artistas ed artists anc betg uschè enconuschents e procuran per puncts culminants musicals sin il pli aut nivel.
Il concert da la societad da musica, il teater da l'uniun da giuventetgna, prelecziuns litteraras, la saira da lotto organisada da l'uniun da tir u la bursa da vestgadira d'uffants. Ils termins per tals eveniments ed anc blers auters èn da chattar sin la nova plattafurma digitala chalender.ch
18 e 19 da fanadur: Festa d’uffants a Laax
Mintga stad sa transfurma la riva dal lai da Laax durant ina fin d’emna en in paradis per uffants. Passa 40 attracziuns spetgan ils giasts tranter 2 e 13 onns. Ils uffants pli pitschens pon visitar preschentaziuns u laschar pitturar la fatscha. Uffants pli gronds pon sa divertir cun raiver harassa, ir cun canu u far auters gieus d’inschign.
Gust da visitar in festivals u openairs? Lura datti qua la survista:
6 fin 31 d'avust: «Das Kraftwerk» ad Andeer
Mai era electricitad simplamain mo electricitad. Ella mida tut – la vita, las cuntradas ed entiras regiuns. Il gieu en il liber raquinta d'in chapitel marcant da l'istorgia regiunala: il lai da fermada da la Valragn ch'ha fatg naufragi avant 80 onns ed il cumenzament da la construcziun da l'ovra electrica Valle di Lei avant 70 onns.