Buna atmosfera, la pli diversa musica per cor ed ureglias ed ina bella culissa amez la natira. Tut quai porschan ils festivals ed openairs ch'èn en las pli differentas regiuns dal Grischun. Durant la stad rapporta RTR regularmain d'intginas da questas occurrenzas cun emissiuns live, fotografias e contribuziuns.
Survista cumpacta dals openairs e festivals en il Grischun / Übersicht der Festivals und Openairs 2026 in Graubünden
| data | festival | lieu |
|---|---|---|
| 19. – 20.03.2026 | SunIce Festival | San Murezzan |
| 01. – 02.05.2026 | Openair 7000 | Cuira |
| 12. – 14.06.2026 | Bergfahrt Festival | Bravuogn |
| 28. – 29.06.2026 | Openair Cavaglia | Cavaglia, Poschiavo |
| 02. – 26.07.2026 | Festival da Jazz | San Murezzan |
| 11. – 12.07.2026 | Openair Rheinwald | Valragn |
| 17. – 19.07.2026 | Openair Safiental | Val Stussavgia |
| 23. – 25.07.2026 | Openair Lumnezia | Degen |
| 24. – 26.07.2026 | Chapella Open Air | tranter S-chanf e Brail |
| 31.07. – 01.08.2026 | Rapid Open Air | Panaduz |
| 07. – 09.08.2026 | fids | Churwalden |
| 07. – 08.08.2026 | ROCKseDRUN | Sedrun |
| 30.08.2026 | Summer Rock Samedan | Samedan |
| 02. – 06.09.2026 | JazzChurFestival | Cuira |
| 11.09.2026 | Arcas Rock | Cuira |
Differentas autras occurrenzas e festas culturalas chattais Vus sin: www.chalender.ch
SunIce Festival
La stagiun da festivals cumenza gia l'avrigl a San Murezzan. Dapi il 2022 datti il SunIce Festival cun musica electronica a la fin da la stagiun d'enviern en il territori da la Corviglia.
Openair Cavaglia
L'Openair Cavaglia porscha mintga onn durant trais dis in mix da concerts da tut il gener sco er ateliers. Sper quai pon ins er giudair la natira en la Val Poschiavo.
Festival da Jazz St. Moritz
Durant in entir mais s’inscuntra la scena da jazz ed artistas ed artists d’auters geners en divers locals a San Murezzan. Il festival porscha per regla er jazz sut tschiel avert e culissa da natira impressiunanta.
Openair Rheinwald
Dapi passa 30 onns ha il festival lieu en il guaud nair sper Nufenen. Suenter trais decennis ha l'Openair Rheinwald gia status da cult en la regiun ed attira mintga onn persunas indigenas e giasts da vacanzas.
Openair Safiental
Amez culms, guaud e dutgs alpins – quai è il pitschen festival en la Stussavgia. Dapi il 2000 datti l'openair che metta pais sin esser persistent, saja quai cun porscher spaisas indigenas e construir l'infrastructura da festival or da lenn. Sin il palc vegnan er gruppas e musicistas e musicists pli pauc enconuschents.
Open Air Lumnezia
Dals 23 fin ils 25 da fanadur rampluna puspè la tribuna a Degen a l’Open Air Lumnezia. L'openair il pli grond en il Grischun attira persunas indigenas sco er da l'entira Svizra – en tut radund 18'000 visitadras e visitaders mintga onn.
Chapella Open Air
Il festival en l’Engiadina è gia vegnì numnà il «Woodstock» en il Grischun ed è in festival ch’è era bain adattà per famiglias. A l'Open Air Chappella, tranter S-chanf e Brail pon ins s'incuntrar e tadlar musica amez e giudair l'atmosfera muntagnarda e calma.
Rapid Openair
Al cumenzament era in vehichel da rapid il palc da l'open air – perquai era il num dal festival. Uss è quai betg pli il cas, dentant èn divers rapids en acziun per transportar chaussas sin l'areal da l'open air. L'open air pitschen a Panaduz datti dapi il 2021 ed el è il successur da l'Openair Hohen Rätien a Seglias en Tumleastga.
ROCKseDRUN
Gia otg giadas hai dà sisum la Surselva a Sedrun il ROCKseDRUN. Il festival porscha ina fin d'emna da musica e quai cun entrada gratuita.
fids
Fids – ubain «Fescht in da Staina» è il festival a Churwalden e porscha differentas activitads sper la tribuna.
Summer Rock Samedan
La fin d'avust stat Samedan en l'Engiadin'Ota sut l'ensaina da rock. Bands localas stattan sin tribuna e procuran per buna atmosfera.
JazzChurFestival
Il cumenzament da settember stat la chapitala grischuna sut l'ensaina da la musica da jazz. Il jazz da l'Europa s'inscuntra en la Postremise a Cuira. Sper musicistas e musicists da renum internaziunal e naziunal stat er la generaziun giuvna sin tribuna. Cun il labor da jazz sco er jamsessions datti er access per musica improvisada.
Arcas Rock
Amez la citad veglia da Cuira sin in dals pli enconuschents plazs è mintgamai l'Arcas Rock. Sin la tribuna sa preschentan musicistas e musicists indigens, dentant er d'ordaifer il Grischun.