Siglir tar il cuntegn

Header

cuntegn

Purtret Gion Giusep Derungs

Il musicist è in dals impurtants cumponists rumantschs. El ha scrit passa 600 ovras ed ussa datti er in register da quellas.

Ils 15 d'avrigl 1932 è naschì a Surcasti (Val Lumnezia) Gion Giusep Derungs sco emprim da set uffants da Christian Josef e Maria Ursula (nata Blumenthal). Strusch ord scola ha el cumenzà a chantar en il chor viril da Surcasti che ses bab (da professiun magister) ha dirigì. Er commember è el stà en auters chors sco per exempel il chor viril Lumnezia (che ses cusrin Gion Giusep Derungs (1905) ha dirigì) ed il chor viril Ligia Grischa.

Gion Giusep ha frequentà il seminari da scolasts a Cuira e suenter dà dus onns scola primara a Cazas. Durant quest temp ha el er dirigì il chor baselgia nua ch'el ha emprendì d'enconuscher sia dunna Antonia.

Suenter il temp da magister a Cazas ha el l ura fatg il diplom da scolast secundar. Dal 1956 fin il 1958 ha el dà scola secundara ad Uors / Lumnezia e lura è el sa decidì da sa deditgar cumplainamain a la musica. Cun 26 onns ha el cumenzà relativamain tard in studi da musica. Dal 1958 – 1964 ha el fatg quai al conservatori da Basilea. Sia dunna Antonia ha accumpagnà el ed en la citad al Rain èn era naschids ils emprims trais uffants da la giuvna famiglia. In temp tut auter che simpel sco quai che Gion Giusep Derungs ha concedì l'onn 2012 en in profil da RTR.

video
Gion Giusep Derungs - in dals pli impurtants cumponists rumantschs
Or da Actualitad dals 21.04.2017.
laschar ir. Durada: 2 minutas 30 Secundas.

Strusch terminà il studi ha la scola chantunala grischuna a Cuira pladì il giuven musicist sco scolast da musica. La famiglia è sa chasada en la chapitala grischuna nua ch'ella ha anc adina ses domicil. A la scola chantunala ha Gion Giusep Derungs instruì fin sia pensiun l'onn 1997.

Il cumponist

Sper la lavur è Gion Giusep Derungs stà in ordvart diligent cumponist. Si'ovra cumpiglia 600 cumposiziuns per chor viril, chor maschadà, chor da dunnas e chors d'uffants sco er chant da solo, musica da chombra ed ovras per orchester. Luzius Hassler e sia dunna han terminà il mars 2022 ina survista, in register da l'ovra cumpletta scritta fin l'october 2017.

Davart il cumponer, chattar l'atgna noda-chasa sco cumponist, chattar inspiraziuns u co metter sin palpiri in'idea musicala ha el dà pled e fatg il 2017 a nossa redactura Astrid Alexandre. In interessanta contribuziun al radio.

Il dirigent

Sper cumponer è el er sa deditgà «a la front» per il chant da chors. Uschia ha Gion Giusep Derungs dirigì divers chors, per exempel il Chor viril Surses, il Chor masdo Surses, il chor viril Ligia Grischa e sco professer er il chor da la scola chantunala. A chaschun d'ina intervista per in artitgel en la revista Bündner Jahrbuch ha Derungs ditg «Il chor tutga a mai». Per chors ha el er scrit las pli bleras ovras.

Sco dirigent e cumponist è Gion Giusep Derungs er stà expert a festas da chant, sco er commember da la cumissiun da musica da l'Uniun svizra da chant (da quella è el er commember d'onur) e da l'Uniun da chant dal Grischun. 

Gion Giusep Derungs en nossas emissiuns da radio:

Artg musical:

audio
Sin ils 90 da Gion Giusep Derungs
ord Artg musical dals 24.04.2022. Maletg: RTR
laschar ir. Durada: 1 minuta.
audio
Gion Giusep Derungs – musica instrumentala
ord Artg musical dals 11.04.2021. Maletg: RTR
laschar ir. Durada: 57 minutas 49 Secundas.
audio
Gion Giusep Derungs – per ses 88avel anniversari
ord Artg musical dals 19.04.2020. Maletg: RTR
laschar ir. Durada: 57 minutas 41 Secundas.
audio
Chor viril Surses – in omagi a Gion Giusep Derungs
ord Artg musical dals 23.04.2017. Maletg: MAD
laschar ir. Durada: 58 minutas 28 Secundas.
audio
Musica e chanzuns da Gion Giusep Derungs
ord Artg musical dals 09.04.2017. Maletg: RTR
laschar ir. Durada: 57 minutas 50 Secundas.
audio
Gion Giusep Derungs per ses 84avel anniversari
ord Artg musical dals 10.04.2016. Maletg: RTR
laschar ir. Durada: 58 minutas 52 Secundas.

Noss chors:

audio
Gion Giusep Derungs – per ses 89avel anniversari
ord Noss chors dals 13.04.2021. Maletg: RTR
laschar ir. Durada: 59 minutas 59 Secundas.
audio
Gion Giusep Derungs – per ses 89avel anniversari
ord Noss chors dals 13.04.2021. Maletg: RTR
laschar ir. Durada: 59 minutas 59 Secundas.
audio
Gion Giusep Derungs - cumponist e dirigent
ord Noss chors dals 07.04.2020. Maletg: RTR
laschar ir. Durada: 1 minuta.
audio
Gion Giusep Derungs
ord Noss chors dals 11.04.2017. Maletg: RTR
laschar ir. Durada: 1 minuta 1 Secunda.

RTR Artg musical 14:00

Artitgels legids il pli savens