En noss chantun datti intginas musicas giuvenilas stablas e fermas per exempel la Musica da giuventüna Engiadina Bassa, la musica giuvenila Lumnezia, la musica giuvenila Valsot u la musica giuvenila da Cuira. Lura datti da quellas che s'entaupan mintg’onn ad in champ e dattan concert sco il Jugendblasorchester u la Jugend Brass Band Graubünden e deplorablamain datti era furmaziuns da giuvenils ch'èn vegnidas e svanidas puspè sco Steilalva Sevgein u las musicas giuvenilas Sur- e Sutsassiala (en Surselva).
Festas chantunalas da musicas da giuvenils
Bel, bun ed impurtant è dentant ch’i dat ellas, las musicas giuvenilas pertge ellas èn quasi il «reservoir» per las societads da musica en vitg e val. Il temp dad oz mussa dentant ch'era las musicas giuvenilas cumbattan per lur agen avegnir. Ord quest motiv vulain laschar resunar ellas e forsa animeschan las registraziuns da cumenzar a sunar instruments a flad.
Las musicas giuvenilas ord l'entir chantun diverteschan cun divers marschs, tocs moderns e schizunt tocs da pag.
