Las lecziuns favuritas da Catia Niedermann eran quellas cun ils giuvenils: «Là sa cristallisavan bunas discussiun davart la vita e lur dubis, ma er davart dumondas criticas en connex cun Dieu e la cardientscha», sa regorda Catia Niedermann che ha instruì otg onns lecziuns da religiun a Domat.
Dapi l’entschatta dal 2024 è Catia Niedermann magistra e mentura da catechesa tar il post da cumpetenza da la Baselgia catolica dal Grischun a Cuira. Il schaner 2026 cumenza in nov curs da scolaziun da catechesa. Enfin fin november 2025 pon ins s'annunziar. Ses giavisch è da pudair recrutar novas persunas che s'engaschan per la cardientscha ed èn prontas da contribuir al svilup social, etic e religius dals uffants.
Il pli bel da la professiun da catecheta è, da pudair dar vinavant als uffants las valurs da la vita, e mussar che la baselgia viva.
Malgrà che las 90 plazzas da catechetas e catechets en il Grischun èn occupadas, sa stenta la Baselgia catolica dal Grischun vinavant da chattar persunas che s'engaschan per la missiun da dar vinavant las valurs da la vita e da la religiun en scola. Il schaner 2026 entschaiva il nov curs da catechesa. «I fiss bel da pudair beneventar ina classa da diesch fin dudesch persunas per il proxim curs da catechesa,» di Catia Niedermann che è magistra e mentura tar il post da cumpetenza da la Baselgia catolica dal Grischun a Cuira.
Sco manadra dal post da cumpetenza da la Baselgia catolica dal Grischun constatescha ella in veritabel fenomen en la Bassa: «Actualmain èn tut ils curs da teologia occupads, a Turitg han ins stuì cumplettar la purschida dals curs causa la gronda dumonda». Quest svilup positiv beneventa era Catia Niedermann ed ella animescha dunnas ed umens da s'annunziar enfin la november per pudair absolver la scolaziun da catechesa per pudair garantir era en l'avegnir avunda catechetas e catechets en il Grischun.
Avair il cor en il dretg lieu, lavurar gugent cun uffants e discurrer la medema lingua sco els è fundamental.
Catia Niedermann è conscienta che catechetas e catechets èn magari confruntads cun sfidas en lur mintgadi. Ina buna integraziun en la plaiv ecclesiastica, en il gremi e las activitads da la magistraglia, simplifitgeschia la lavur. «Igl è impurtant che ils geniturs realiseschan che era la catecheta contribuescha al svilup da l'uffant durant il temp da scola e che els vesan l'ura da religiun sco lieu per il svilup da las cumpetenzas socialas ed interreligiusas da lur uffants».
-
Bild 1 von 3. Catia Niedermann è mentura e magistra da catechesa. Catia Niedermann durant ina lecziun da catechesa tar il post da cumpetenzas da la Baselgia catolica dal Grischun. Bildquelle: Baselgia catolica dal Grischun.
-
Bild 2 von 3. Cudeschs e carnets per l'instrucziun da religiun. Tar l'instrucziun da religiun tutgan era temas religius ecumenics. Bildquelle: Catia Nidermann.
-
Bild 3 von 3. Emprender a moda creativa l'istorgia da Jesus. In exempel d'in carnet d'instrucziun da religiun per uffants da la scola primara. Bildquelle: Catia Niedermann.
Tar la lecziuns da religiun na quintan betg las notas, mabain l'uffant e ses conturn.
La gronda part dals uffants giaja gugent a lecziun da religiun, era sch'els appartegnian forsa ad ina autra confessiun e cultura. «L'impurtant è da far chapir ils uffants che nus essan tuts umans e che nus cartain en in Dieu. Era sche quel ha in auter num en lur cardientscha», declera Catia Niedermann. Uschia possian ils uffants chapir ed acceptar la diversitad da confessiuns e culturas.
Dapli informaziuns davart la scolaziun da catechesa chattan ins tar «Baselgia catolica dal Grischun».