Tut ils engaschis professiunals da Bernard Cathomas han gì l’idea dad unir Rumantschas e Rumantschs. Quai vala per las Scuntradas rumantschas, per il svilup dad ina gasetta quotidiana, per la lescha da linguas che dat al rumantsch in statuts ferm ed era per la creaziun dal rumantsch grischun.
Dentant sch’ins è pitschen, na ston ins betg anc sa sparter. Ins na sto betg anc sa far pli pitschen che quai ch’ins è. Ils pitschens sto empruvar da sa far pli ferms, da mussar lur fermezza cun concentrar las forzas. E quai ha duvrà bleras discussiuns, blera motivaziun, bler insister.
«Jau sun stà quel ch’ha in zic inizià, in zic stuschà, in zic fatg las discussiuns e guardà che las cundiziuns sajan dadas», di Bernard Cathomas en il «Profil». El n’haja betg fatg tut sulet.
RTR
Avant 20 onns ha RTR pudì inaugurar la chasa da medias rumantscha. Quels da la televisiun na sajan betg vegnids gugent en la chasa nova, sa regorda l’anteriur directur da RTR. Els stevan fitg gugent a l'ur da la citad ed avevan sviluppà in’autra cultura da manaschi che quella dal radio rumantsch.
Lia Rumantscha
Il 1980 è Bernard Cathomas vegnì elegì sco secretari da la Lia Rumantscha. El ha inizià il rumantsch grischun. Il cumenzament ha questa lavur pudì vegnir fatga senza grondas dispitas e resistenza. Ma enturn ils onns 1990 hai cumenzà a dar attatgas massivas envers Bernard Cathomas.
Gea, jau hai survegnì smanatschas da mort.
I fetschia impressiun da survegnir smanatschas da mort. «Ed jau hai era gì tema», conceda l’anteriur secretari da la Lia Rumantscha. Questas agressiuns sajan dentant mo vegnidas da paucas persunas.
Nus faschevan quai per gidar il rumantsch, per dar al rumantsch dapli forza – quai ch’il rumantsch grischun ha er dà.
Bernard Cathomas ha vita duranta lavurà. Sco buob sco chavrer, pli tard er autras lavurs tar ina banca u sin il bajetg. Ses studi al seminari da scolasts a Cuira, il studi a l’Universitad da Turitg ed il temp vi da sia lavur da docter ha el finanzià sez. E quai malgrà ch’el aveva durant ils studis a Turitg gia famiglia.
Creschì si è Bernard Cathomas a Breil en ina famiglia cun 14 uffants. Quests dis festivescha el ses 80avel anniversari.