Siglir tar il cuntegn

Header

audio
Bruno Cathomas: «Jau hai etica, dentant nagina morala»
Or da Profil dals 26.10.2022.
laschar ir. Durada: 57 minutas 16 Secundas.
cuntegn

Bruno Cathomas «Jau hai etica dentant nagina morala»

Bruno Cathomas è actur, artist, reschissur, teatrist. El è da vesair sin tribunas da teater, en films e producziuns da televisiun. Tabus na datti nagins per l'actur da Laax. I dat naginas rollas ch'el na faschess betg.

Bruno Cathomas sa regorda da sia emprima preschentaziun da teater insumma. El aveva 4 u 5 onns, è vegnì sin tribuna e tuts han cumenzà a rir. El na saveva dentant betg daco.

Lura hai jau dà zutger a l'asen e survegnì applaus da scena.
Autur: Bruno Cathomas Actur da Laax
Purtret da Bruno Cathomas
Legenda: Bruno Cathomas ha guadagnà il Premi dal film svizzer dal 2008. RTR

Bruno Cathomas ha blers onns gì ina relaziun ambivalenta cun ses origin. El è stà vilà sin tut quai ch’el ha gì. Ma uss saja el bler pli fitg tar sasez che avant 11 u 12 onns, di el.

Jau hai fatg la pasch cun mes origin.
Autur: Bruno Cathomas Actur da Laax

Bruno Cathomas lavura sco actur or da la tema. Da na betg savair quai ch’el sto savair. Betg savair il text, betg savair daco ch’el è en quest mument en quest plaz. «Ma sch’ins lascha tiers quella tema datti in mument ch’ins è sco blut e lura cumenza la creativitad. Pli baud hai jau lavurà fitg or da la tema, fitg agressiv encunter mamez», di Bruno Cathomas. El ha emprendì da tegnair ora la tema ed è uschia pli avert.

En in onn hai jau otg, nov giadas per 10 secundas muments perfetgs sin tribuna. Per quests muments lavur jau il rest da l’onn. Igl è muments religius – ins è cun sasez en il dretg lieu en il dretg mument.
Autur: Bruno Cathomas Davart muments perfetgs sin tribuna

Sia moda a maniera da far teater descriva l’actur che viva a Berlin e Cologna sco agressiv. «I dovra blera segirezza da tatez. Ti stoss esser datiers da tai. Quai dovra gronda sinceradad envers tatez.»

Bruno Cathomas descriva sasez sco manic. E sch’ins è manic na vegn ins betg dad esser quiet. Il temp da corona è stà il mender temp da sia vita, perquai ch’el ha gì da star a chasa e na gì da far nagut.

Il pli gugent fiss jau blond e grond cun egls blaus.
Autur: Bruno Cathomas Davart sia parita

Peiden – in teater da e cun Bruno Cathomas

«Peiden» raquinta dad in vitg muntagnard situà sin ina spunda sulegliva. In vitg ch’è ars duas gia, ch’è vegnì reconstruì e che ruschna plaunet da la spunda giu. Igl è in'atgna producziun dal Teater Cuira che ha premiera sonda ils 29 d'october.

audio
Peiden: Premiera dal teater
ord Actualitad dals 29.10.2022.
laschar ir. Durada: 3 minutas 52 Secundas.

RTR profil 09:00

Artitgels legids il pli savens

Scrollar a sanestra Scrollar a dretga