La fin d’october, il terratrembel en chasa RTR: la directura Ladina Heimgartner banduna ses post per la fin da quest onn. E tge fa’la, «Ladina va tar il Blick...», avevi num en ils sulers dad RTR. Pli precis, ella daventa commembra da la direcziun da la chasa da medias Ringier che producescha en 19 pajais ils pli differents products schurnalistics. Ella è là responsabla per il «Corporate Center». Quai è la centrala che sa fatschenta cun tut las dumondas strategicas da l’interpresa e da la communicaziun.
Suenter 13 onns SRG SSR saja temp per ina nova sfida, di Ladina Heimgartner. Ella mida en l’economia privata, experientschas che pudessan forsa in di esser d’avantatg sche l’SRG SSR dovra ina nova directura generala... U sco quai che Ladina Heimgartner ha ditg ad RTR. «I mai nun as sa.»