Dapi blers onns giogan las flurs ina rolla fitg impurtanta en la vita da l’Engiadinaisa. Cun 16 onns ha Anita Malgiaritta cumenzà l’emprendissadi da flurista – e fin ussa è la mamma da dus uffants creschids restada fidaivla a sia passiun. Oz ha la dunna da 49 onns ses agen affar d’orticultura – cun ina butia a Scuol ed ina a Samedan. La lavur cun flurs n’è betg mo ina chaussa dal cor, ma er ina da famiglia: l’affar maina Anita Malgiaritta dapi 26 onns ensemen cun ses um Daniel. Sias lavurs preferidas en butia èn il scolar giarsuns e giarsunas – per il mument è quai la figlia, che finescha quest onn l’emprendissadi da flurista. Ma era decoraziuns per nozzas fa Anita Malgiaritta gugent – gist uschè gugent, sco cussegliar per sepulturas, nua che las flurs pon er esser consolaziun. E tge èn las flurs preferidas da l’experta? La resposta è spert chattada: flurs da prada.
Nossa moderatura Ladina Schena ha discutà cun l’experta da flurs Anita Malgiaritta davart tips e trics en connex cun la decoraziun per la festa da Nadal. Tranter auter:
- Decorar la maisa festiva cun flurs e material indigen
- Tips per decoraziuns simplas
- Senza stress – tips e trics per preparar ordavant la decoraziun
- Decorar ensemen cun uffants
