In punct da partenza persunal: Mes bab è vegnì mors da buob d’in chaun. Quai ha accumpagnà el sia vita entira: Adina cura ch’el stueva ir insanua ch’el n’enconuscheva betg, dumandava el sch’els hajan in chaun e sche gea, ch’els duessan far uschè bain e metter il chaun vi da la chadaina. Nossa famiglia n’è mai stada ina famiglia da chauns. Senza reproscha: Noss bab n’ha betg pudì dar vinavant quel gen. Ed ussa hai jau fatg in film davart chauns ch’han da proteger ina muntanera. Jau hai pia lavurà cun chauns, ch’èn spezialmain bain attents sin tut quai che s’avischina a la muntanera.
A l’entschatta da la filmada èn ils dus chauns sa concentrads sin il chaun da chasa Filou e sin ils novs patruns, Mario e Jovita. Uschia hai jau pudì tegnair in pau distanza e pudì observar.
Ora sin la pastgira, cura che Jovita Alig era en la vischinanza, han ils chauns adina laschà vegnir datiers, laschà filmar las nursas e la fin è in dad els perfin sa platgà sin mia chomma. Dentant gnanc ina mes’ura pli tard, cura che Jovita Alig n’era betg pli cun mai, han ils chauns urlà e fatg pulitas vargugnas cura ch'jau hai vulì entrar en il claus. Els n’avevan betg anc la fidanza, jau hai stuì star dadora.
Mais pli tard, suenter 7 inscunters, hai jau vulì observar co ch’ils chanuns sa movan entaifer la muntanera. Jau sun entrà en il claus ed els han finalmain acceptà mai: ils chauns èn l’emprim restads sin distanza senza urlar e cura ch'jau hai clamà els, èn els m’avischinads.
Davent da quel di han els enconuschì mai ed jau hai pudì m’avischinar senza privel da tut las uras e da tutt’aura.
