«I dat in basegn da translatar tranter las generaziuns», quai di l’autura Christina Caprez davart ses cudesch «Queer Kids». I saja ina tematica che fatschentia ils giuvens e las giuvnas. I dettia giuvenils che s’identifitgeschian sco lesbas, omosexuals, persunas nunbinaras, trans. I dettia scolastas e scolasts ma era geniturs che na chapeschan betg tge che quai è.
Mintga giada ch'ina persuna queera – per exempel in um – discurria da ses ami, saja quai gia in outing. E quai dettia en egl. Ed i dovria temp ed engaschi fin che persunas queeras tutgian tar la normalitad. I dovria il cudesch «Queer Kids» per far visibel che questas normalitads existian. Ma la normalitad n’existia anc betg en ils cudeschs da scola, en romans. Cunzunt per ils giuvens dovri questa visibilitad.
Giuvens queers èn dapli che lur sexualitad. Els èn sco tut ils auters era.
Nic Senften ch’ha 26 onns descriva sasez sco queer ed omosexual. El di ch’el tutgia tar ina minoritad ed era tar ina gruppa vulnerabla. Ed el haja fatg bleras experientschas negativas.
Er sche mes conturn il pli datiers è bun, il rest da la societad è tuttina ostila vers mai.
I saja impurtant da tematisar igl esser queer, da far visibel talas persunas, da discutar da quai, manegia Nico Egli.
Infurmaziuns e links
Uss èsi in tabu e perquai para il tema grond.
I saja in problem che l'esser queer vegnia reducì be sin la sexualitad. Quai di Sanja da Cuira. Persunas eterosexualas na raquintian era betg da lur sexualitad.
Tge che manca èn pussaivladads d’inscunter da giuvens queers en Grischun.