Dapi 17 onns è Claudia Alini-Cadonau, oriunda da Ramosch, puspè da chasa en Engiadina Bassa. A Scuol viva ella cun ses um en ina chasa a l’ur da la vischnanca, nua ch’ella maina er ina butia creativa cun artitgels ed urdains ch’han il bul rumantsch.
Atgnamain avess Claudia Alini-Cadonau emprendì gugent da fotografar professiunalmain. Dentant fiss il viadi a scola stà memia lung e surtut Son Gagl memia lunsch davent da sia patria en Engiadina. Suenter avair fatg il diplom mercantil a l’Institut Otalpin a Ftan ha la dunna da 46 onns fatg ses emprim pass da sia carriera professiunala en il mund dal turissem. En il biro da turissem a Schlarigna ha ella lavurà al spurtegl, cun blers contacts cun giasts e persunas indigenas. Ina lavur ch’haja gì duas varts.
Il contact cun la glieud m’ha gia adina plaschì. Dentant esser culpaivla nungiustifitgadamain per raubas ch’ils giasts han da reclamar, era main mia visiun per mia vita professiunala.
Durant sia segunda scolaziun sco massadra medicinala ha l’Engiadinaisa gì invista en differentas partiziuns, tranter auter er en l’oncologia cun in practicum en Germania. Claudia Alini ha gia adina lavurà gugent cun ses mauns ed ha uschia era ristgà avant 14 onns d'avrir sia atgna butia creativa a Scuol. La lingua rumantscha, cun versins rumantschs, sa tira sco in fil cotschen tras la rauba ch’è en vendita. Sper la butia ha ella dentant adina gì anc ina «segunda chomma». Saja quai tar l’uffizi da taglia u er oz sco coordinatura tar Sendas grischunas.
Natira e chatscha
La pli gronda passiun da Claudia Alini-Cadonau è dentant la natira e sa muventar en quella. Il temp liber passentian ella e ses um per la pli gronda part en lur chamona en la Val S-charl. Qua va la dunna sportiva cun chavels lungs stgirs er a chatscha, il pli gugent a chatscha bassa.
Il pli gugent vom jau a chatscha bassa. Quella è pli quieta ed igl è pli il giudair che stat en il center, er lavurond cun noss chaun.
La passiun per la chatscha la saja vegnida messa en tgina da ses bab e da tut la famiglia. En il «Profil» raquinta Claudia Alini-Cadonau era daco ch’ella na pudeva betg giavischar als chatschaders «en bucca d’luf» sco matta e co ch’ella è ida enturn cun il fatg da betg esser vegnida mamma.
