Il film «(Sur)viver en la natira» raquinta da la vita selvadia: Da Vivian Putscher che ha vivì in entir onn en ils guauds da l’America dal Nord. Da Markus Vogler che vesa ses skills da surviver sco sia segirada da vita en temps intscherts. E da l’experientscha che la redactura dal «Clic» ha fatg sezza, cura ch’ella ha stuì ir or en il libere surviver quatter dis e quatter notgs.
Quant bain vegnissas ti a frida, sche ti stuessas surviver or en la natira? E tge prendessas ti cun tai? Tge mancass a tai il pli svelt?
Far fieu, chattar aua, construir in lieu protegì per durmir: Nina ha emprendì durant in onn en la scola da natira co surviver or en il liber. Ma cura ch’ella sto propi far quai sco finiziun da la scolaziun, vegn ella a ses cunfins. Zeccas, fom, mancanza da sien: tut quai na dovra betg mo energia corporala, mabain era forza mentala.
Jau sun vegnida tar mes cunfins durant mes trip da surviver. In pèr notgs n'hai jau quasi betg durmì ed igl ha anc dà urizis. Jau ma sun sentida uschè flaivla, aveva fom, fraid e leva ir a chasa. Là sun jau schon ma dumandada pertge ch'jau fatsch quai. A tgi vul jau mussar insatge?
Ma Nina ha emprendì dad in expert: Markus Vogler da Trin. Markus è stà gia savens en la natira senza nagut sin expediziuns da surviver. Per l’ina gidia quai da sa colliar cun la natira, manegia el.
Ma per l’autra dettia quai ad el la fidanza ch’el vegnia da surviver, independentamain da tge che gira tut sin quest mund.
Viver en la natira u viver datiers da la terra è daventà per mai ina assicuranza da vita. Sche jau n'hai insumma nagina vestgadira u sche jau hai vestgadira ed in cuntè n'emporta betg. Jau poss ir mintga mument, poss ir ora en il guaud e viver dadora. Quai ma dat propi ina gronda confidenza.
Era Vivian Putscher è stada sco Nina ina scolara da la natira en la scola a Trin. Ma ella ha betg gì avunda cun in trip da surviver dad in pèr dis. Perquai è ella s’annunziada per viver in entir onn en ils guauds da l’America dal Nord – durant l’enviern fraid e la stad plain mosquitos, senza possess persunal.
Igl aveva fitg blers mosquitos là nua ch'jau era. Igl ha dà in mument durant mes onn giuadora, cura ch'jau sun levada la damaun ed hai pensà: «Jau na poss betg pli far quai. I na va betg!». Jau era be pli vi da cridar e na vuleva vesair nagin.
La scola da natira
-
Bild 1 von 6. En la scola da la natira a Trin emprendan ils participants chaussas praticas per surviver: far fieu, chattar aua, metter traplas, construir in shelter per durmir. Bildquelle: Nina Defuns.
-
Bild 2 von 6. Nina e ses conscolars han d'absolver ina expediziun da surviver quatter dis e quatter notgs. Bildquelle: Nina Defuns.
-
Bild 3 von 6. Per mangiar datti quasi mintga di ina schuppa d'ervas. Bildquelle: Nina Defuns.
-
Bild 4 von 6. Durant il trip da survival piglia la gruppa da Nina cun uschè pauc material sco pussibel. Uschia èsi da far sez ils tschaduns per mangiar la schuppa d'ervas. Bildquelle: Nina Defuns.
-
Bild 5 von 6. Er zambregiar balesters, paliets u autras armas è ina part da la scolaziun da natira. Bildquelle: Nina Defuns.
-
Bild 6 von 6. Suenter in onn da scolaziun ed in trip da surviver èn ils scolars e las scolaras diplomads sco trenaders e pedagogas da la natira. . Bildquelle: Nina Defuns.
