La plattafurma «Face Migration» sa deditgescha a la perscrutaziun da la migraziun ed a projects d’art, realisads cun e davart umans fugitivs. Ensemen cun il «Seefelder Kammerchor» da Turitg han ils respunsabels da «Face Migration» sviluppà in project da concert e litteratura. A quest project sa participeschan era pliras migrantas e migrants ch’èn vegnids da territoris da guerra da tut il mund en Svizra.
Nus vegnin tuts e tuttas pir ensemen per l’emprima prova il di avant il concert. Quel entir project è per nus in pau sco in viadi a riva nunenconuschenta.
La cantata «Brich dem Hungrigen dein Brot» da Johan Sebastian Bach stat en il center – in appel a l'amur per il proxim ed a la solidaritad. Era furma la cantata barocca il rom per ina part musicala, cumponida da nov. Quels suns simboliseschan la patria, l'ester e l'esser da viadi tranter qua e là. Tranteren prelegian las auturas ed ils auturs fugitivs lur istorgias davart lur experientschas existenzialas sin la fugia – en ina lingua, en la quala els han pir gist stuì chattar ina nova patria.
Igl è bel d’udir che quels texts tractan dasper la suffrientscha er elements umoristics, schizunt sarcastics. Il text «Das Mittelmeer» da l'autur Jafar Sael è fitg direct, sarcastic e stat per ina vardad crudaivla. L'autur sez è fugì en bartga sur la Mar Mediterrana.
Vita e cretta ha visità ina prova da chant dal chor. Il dirigent raquinta da sias experientschas cun il project. Ed ina da las chantaduras, ch’è er ina experta da migraziun, explitgescha co che l'art è bun da crear in access al tema dispitaivel da la migraziun a la societad. E co ch'el po esser ina schanza per ils umans en fugia.
I va per accentuar l'enritgiment e da numnar la sfida che la migraziun ha per consequenza.
