Siglir tar il cuntegn

Header

video
Erica Predetti è morta: Tgi era l’artista e scriventa che ha survegnì sco emprima dunna il premi grischun d’art?
Or da sil punct dals 18.07.2022.
laschar ir. Durada: 2 minutas 26 Secundas.
cuntegn

14-7-2022 La scriptura ed artista figurativa Erica Pedretti è morta

Gievgia passada è morta a Tenna la scriptura ed artista Erica Pedretti, quai annunzia il Museum d'art dal Grischun. Cun ses um Gian Pedretti ha ella vivì blers onns a Schlarigna. Ella ha scrit divers cudeschs ed è vegnida undrada sco emprima dunna cul Premi grischun da cultura.

audio
La vita ed ovra dad Erica Pedretti
ord Actualitad dals 18.07.2022.
laschar ir. Durada: 5 minutas 19 Secundas.

Sia vita

Erica Pedretti è naschida ils 25 da favrer 1930 a Ṧternberk, Moravia dal nord, en la Republica Tscheca actuala. Cun 15 onns è ella vegnida cun in tren da fugitivs da la Crusch cotschna en Svizra. A la scola d’art applitgà a Turitg ha ella frequentà la classa professiunala per argienters ed argienteras. Qua ha ella emprendì d’enconuscher ses futur um, l’artist Gian Pedretti. Cunquai che sia famiglia n'ha però betg survegnì il permis da restar en Svizra èn els emigrads en ils Stadis Unids.

Suenter in segiurn a New York, nua ch’ella ha lavurà sco aurera ed argientera, è ella turnada il 1952 en Svizra ed ha maridà Gian Pedretti. Ensemen han els gì tschintg uffants. Il pèr ha vivì, sper blers segiurns a l’ester en connex cun incumbensas d’instrucziun e stipendis da scriver, ubain a Schlarigna en il Grischun ubain a La Neuveville al Lai da Bienna.

Sia ovra

Il 1970 ha Erica Pedretti publitgà ses emprim cudesch «Harmloses, bitte». En ses raquints e romans è l’esser ester e senza patria in tema principal. Ella ha retschavì numerus premis da litteratura, uschia il 1984 il Premi Ingeborg Bachmann per il text «Das Modell und der Maler» che è daventà punct da partenza per il roman «Valerie oder Das unerzogene Auge» ch'è cumparì l’onn 1986. Il 1999 è Erica Pedretti vegnida undrada sco emprima dunna cul Premi grischun da cultura. Per sia ovra cumpletta litterara ha ella survegnì il Premi svizzer da litteratura.

Sper sia activitad litterara ha Erica Pedretti stgaffì ina vasta ovra d'art figurativa ch’ella preschentava regularmain en exposiziuns, il davos il 2020 per ses 90avel anniversari en ina gronda retrospectiva en il Museum d’art dal Grischun a Cuira. Schebain che Erica Pedretti chapiva tuttas duas activitads sco furmas d’expressiun independentas, cumbinava ella scrittira e maletg en sias ovras.

Sias sculpturas d’alas, objects e dissegns mussan in equiliber labil ed ina fragilitad fina. Igl è la sensibilitad e vulnerabilitad da l’esser stratg davent che uneschan l’ovra litterara e quella d'art figurativa. Quellas parallelas ha però pir ils ultims onns survegnì dapli attenziun. Enconuschenta è ella vegnida sco scriptura en la vegliadetgna da 40 onns e suenter schegea ch'ella fascheva da lez temp gia art figurativ.

RTR novitads 12:00

Artitgels legids il pli savens