Ils «nauschs» sa radunan a Zug. 276 lutgaders, 7 rintgs da resgim, 1 arena gigantica cun 56’000 visitaders: tge festa, tge atmosfera, tge tensiun! La Festa federala da lutga è stada in dals puncts culminants da l’onn. Da la partida eran 7 Grischuns, manads da lur leader – «noss» Orlik Armon, sco ch’ins auda mainsvart en il Grischun – han els fatg il viadi vers Zug. Per il titel dal retg n’han els betg pudì cumbatter, er betg Orlik Armon. Quai che resta èn ils cumbats spectaculars, ils «nauschs» suentads, ils bels purtrets e l’imposanta atmosfera. E la foto dal retg Stucki Christian ensemen cun «Kolin». Kolin? Il muni ch’il victur ha retschet. E na! Kolin, il taur da 1200 kilos, n’è betg sa tschentà en stiva, curtin u taglier da Stucki. El ha dastgà turnar enavos en stalla tar sias puschas.
