La novitad ch'i dettia en Svizra dapli persunas senza religiun che persunas catolicas n'ha forsa betg fatg surstar blers. Ils refurmads èn stads en la medema situaziun gia il 2016. Questas cifras da l'Uffizi federal da statistica dateschan dal 2022. Segir han ils cas d'abus sexuals en la Baselgia catolica ch'in studi da l'Universitad da Turitg ha purtà a la glisch, contribuì dapi lura ad ulteriuras extradas.
Er en il Grischun sa reducescha il dumber da persunas catolic-romanas ed evangelic-refurmadas, dentant mintgamai per pli pauc che l'augment dal dumber da persunas senza confessiun.
Dentant n'han betg explicit las cifras las pli actualas u il studi motivà il redactur da Clic, Dominik Hardegger, da sa fatschentar cun questa tematica. Ses motiv è stà in patratg che gira gia dapi onns en ses chau – u ina dumonda: Poss jau m'identifitgar cun la Baselgia catolica? Per motivs da transparenza èsi er da dir che Dominik è vegnì battegià ed ha survegnì l'emprima communiun. Ma ir a messa u participar a festas ecclesiasticas n'è mai stà in'opziun. Memia lunsch eran la Baselgia ed il maletg che Dominik ha da quella ord l'auter da ses interess.
Tuttina ha el vis e vesa anc adina che la Baselgia ha ina rolla impurtanta per ina gronda part da la populaziun. Saja quai sco lieu per undrar Jesus Cristus en ina messa a moda communabla, sco «organisatura» da festas e celebraziuns sacralas u sco instituziun che definescha l'interpretaziun da la Sontga Scrittira.
Medemamain è la cardientscha insatge impurtant per la glieud. Ella po dar speranza, orientaziun per la vita e respostas sin dumondas ch'ins na po uschiglio betg respunder. La cardientscha è fitg persunala ed individuala, e qua sustegna la Baselgia cun in rom da mussavias ed instrucziuns.
Da temp e portas avertas
Viola Cadruvi, autura, ha scrit il 2014 sia brev d'extrada or da la Baselgia. Dentant èn passads radund trais onns fin ch'ella ha piglià la decisiun dad inoltrar quella. Medemamain ha era Robert Derungs dad Uors prendì temp per la decisiun. Per betg passar giu per ils pes a ses geniturs ha el spetgà fin l'atun passà per extrar. En general pon ins dir ch'ils partenaris d'intervista per quest «Clic» èn da l'avis ch'il temp gidia a daventar conscient da la rolla da la Baselgia en l'atgna vita.
«Jau emprov da viver tenor las valurs cristianas»
Per sentir il puls tar la populaziun, sche la glieud va anc en baselgia e sch'i dat anc persunas religiusas, ha RTR fatg ina curta visita a Glion.
Sa chapescha che questa retschertga n'è betg represchentativa e mussa be las persunas entupadas.
Or da l'archiv:
