Da las 39 artistas ed artists ch'exponeschan èn 8 sut 30 onns. Tranter auter era Davina Andrea Deplazes (*1999, Surrein) e Fadri Cadonau (*1996, Glion). Fadri Cadonau dastga gia per la terza giada exponer sias ovras a l'exposiziun annuala e per Davina Andrea Deplazes èsi la segunda giada.
Igl è ina gronda onur da pudair mussar a l'entir chantun tge ch'ins fa. Ed exponer en in museum era schon adina in da mes gronds giavischs e che quai è gia pussaivel uss è fitg spezial per mai.
I saja schon insatge tut auter da preschentar las atgnas ovras avant in public e conturn ch'ins enconuscha, dian la Sursilvana ed il Sursilvan. Tge effect che questa pussaivladad da dastgar esser part da l'exposiziun annuala dal museum d'art a Cuira ha sin la carriera dalla artista e l'artist, saja grev dir, manegian els.
I va vinavant suenter quella exposiziun. Ins ha dapli squitsch perquai ch'ins less proxim onn puspè dastgar exponer in'ovra e vegnir meglier – ma da l'autra vart pon ins era esser quietà per in mument e giudair.
Dal ballapedist tar l'artist
In auter giuven artist è Loris Brasser (*1996, Schlieren). El è creschì si mez da sia vita a Turitg e tschella mesadad a Sursaissa e Cuira. Ses siemi è stà oriundamain da daventar profi da ballape. Pervia d'ina blessura ha el dentant stuì terminar tar Vaduz ed ha chattà sia nova passiun en l'art.
Quest onn ha el fatg il bachelor en «Fine arts» a la Scola auta turitgaisa d'art. Il giuven da 26 onns di, ch'el haja savì profitar d'intginas chaussas da sia carriera da ballape per l'art, per exempel d'esser disciplinà e betg dar si:
5% è talent e 95% è disciplina – tant tar il ballape sco tar l'art.
Ils artists grischuns da renum èn da partida
Er ils artists etablids han exponì: Mirko Baselgia, Ester Vonplon, Gaudenz Signorell, Jules Spinatsch, Annatina Graf u era Sara Masüger u Zilla Leutenegger.
Ins vesa, che bleras artistas ed artists han antennas finas e dumognan da purtar en quai en lur ovras. Jau chat quai positivamain surprendent e fitg interessant, sch'ins vesa quant actual che las artistas ed ils artists sa movan.
En l'exposiziun vegn fatg savens il connex cun l'actualitad e las novitads. Uschia tematisescha Jules Spinatsch (*1964, Tavau) en «Exzelenskyy in Davos» la guerra en l'Ucraina en connex cun il WEF a Tavau. Temas sco midada dal clima, digitalisaziun u era l'agir social in cun l'auter han era plaz en l'exposiziun.
Er l'artista giuvna Silvie Noemi Demont (*1996, Cuira) dat en egl cun si'ovra «Laufender Meter» che mussa l'enorm consum da textilias. Andrea Francesco Todisco (*1998, Razén) expona in'ancra cun il titel «Anker und Erde».
Premi d'art da l'Uniun grischuna d'art 2022 va ad Olga Titus
Sper la preschentaziun da las artistas ed ils artists per l'exposiziun annuala è era vegnì annunzià la victura dal Premi d'art 2022: Olga Titus. Ella è uschia la quarta titulara da quest premi. Sut l'aspect da sia biografia svizra, indica e malaisica reflectescha l'artista dumondas davart l'identitad e davart il caracter cultural.
Ses maletgs or da pagliettas stampadas, sias installaziuns e las lavurs da video stgaffeschan in cosmos captivant dad estetica bollywoodiana, folclora, cultura da pop e munds da gieus da computer. En l'exposiziun en il Museum d'art dal Grischun mussa Olga Titus sia pli gronda ovra da pagliettas da fin ussa.
