Il Premi grischun da litteratura 2021 vegn repartì sin duas auturas ed in autur che represchentan tant la varietad linguistica sco era litterara en tut sias furmas d’expressiun – texts scrits ed orals, poetics e satirics, romans e chanzuns, teaters e texts schurnalistics – e quai en furma analoga sco era digitala.
- Asa S. Hendry survegn il premi per ses emprim roman remartgabel «Sin lautget» en lingua rumantscha. Quel tracta da maniera poetica e cun gronda sensibilitad ed intelligenza tematicas fitg sensiblas ed actualas.
- Ursina Trautmann survegn il premi per sia activitad litterara multifara ed engaschada sco schurnalista libra, autura e slammadra da lieunga tudestga.
- Luca Maurizio, il chantautur e cabarettist da lingua taliana e bregagliotta, survegn il premi per il tun poetic da sias chanzuns e per la satira lucida da la societad che s’exprima en sias preschentaziuns divertentas e murdentas.
Il premi ch'è dotà cun 10’000 francs è vegnì surdà da la Fundaziun premi grischun da litteratura. L’act festiv-ludic-litterar ha gì lieu en la biblioteca da la chasa von Sprecher a Maiavilla che vala sco la pli gronda biblioteca privata dal Grischun. Il cabarettist Flurin Caviezel ha moderà ed enramà musicalmain la surdada dal premi ch'è vegnì surdà ils 7 d'avrigl 2021.