Cun pails, mascras e scalins
La mesemna da la tschendra van uffants da scola vestgids en costums da chasa tar chasa e battlegian maglias. Suenter gentar datti lura moviment cura ch'ils buobs ch'èn gia ord scola van sco «Puschurirollis» vestgids cun pails e mascras, tras il vitg. Cun in sdratsch nair da cotgla e grass emprovan els da dar colur als uffants da scola ed anc pli gugent a las mattas ledias ch'emprovan da sa zuppar. Dar colur cun la cotgla vegn numnà «z’pschuurä». Darar mitscha insatgi da questa acziun. La saira sa mettan ils buobs ensemen en gruppas e battlegian ovs. Quels vegnan pli tard cuschinai en ina ustaria e partids cun las mattas. Quai succeda savens pir da mesanotg.