En il rom da la seria «Il Grischun en 100 onns» da RTR ha «Vita e cretta» fatg dumondas en connex cun l'avegnir da la Baselgia refurmada avant intgin temp. Respundì han Anja Felix, preditganta refurmada che viva a Sagogn, e Michel Müller, president dal cussegl-baselgia dals refurmads en il chantun Turitg. El sa fatschenta dapi onns cun l’avegnir da la Baselgia refurmada.
Questa giada examinain nus l'autra gronda baselgia cristiana: la Baselgia catolica. Quai faschain nus cun Marcel Köhle, teolog e pedagog che abitescha a Glion e lavura sco scolast primar a Sursaissa. El fa ina u l'autra ipotesa ed exprima ses giavischs persunals. Giavischs, co la Baselgia catolica pudess sa transfurmar ed en tge direcziun ch'ella pudess sa mover en l'avegnir.
La baselgia stuess avair il curaschi da metter en dumonda sias respostas e sia ideologia. Quai fiss er ina schanza per ella.
Sch'ins avess structuras pli democraticas e pli sinodalas pudess ins era discussiunar davart tge ch'i valess da conservar e tge ch'i fiss da midar, uschia che la baselgia chatta puspè la buna via.
Er en vista a la digren cuntinuanta da commembers e commembras da la Baselgia catolica saja quai impurtant d'adina puspè analisar, metter en dumonda e da dar in sguard en il futur. Da quella ed autras persvasiuns raquinta Marcel Köhle en «Vita e cretta».
