Cuntrasts - Davos las culissas da «In Plantahof per la Georgia»

Viadi en Georgia

Per realisar il film è Curdin Fliri viagià tschintg giadas en Georgia cun Curdin Foppa ed ina giada persul. Il viadi da Cuira fin a la scola en Georgia ha cuzzà 18 fin 20 uras – per ordinari. Ma igl è stà durant il temp da Corona, e quai ha prolungà il viadi. L'onn 2022 èn els viagiads da Cuira sur Turitg a Warschau, vinavant a Riga, da là a Tbilissi e la finala a Sarkineti. Quest viadi è lura stà passa 4'000 kilometers en 40 uras enstagl da bun 2'800 kilometers lingia d'aria.

Georgia – in pajais multifar

Avrir la box Serrar la box

Cun terrens muntagnards, planiras e la Mar Naira schai la Georgia sin trais zonas da clima. In pajais fitg multifar cun ina natira spectaculara e fitg varianta. La Georgia schai sin il cunfin tranter l’Europa e l’Asia e vegn gugent era numnada «il balcun da l’Europa».

Dal balcun han ins il pli ina buna survista, uschia era sin 5201 meters sur mar sin il pli aut piz dal pajais – il Schchara. Quel è part d’ina chadaina da muntognas imposantas cun nov pizs. «Nov» è era la muntada dal pled Schchara sin il linguatg Svan che vegn oz anc pledà be da fitg paucs en la Georgia. La lingua principala dals var 3,7 milliuns abitants dal pajais è dentant il georgian.  

Il concept è sa sviluppà

Il concept dal film saja plitost stà in'idea e sa sviluppà spontan, di Curdin Fliri. Cumenzà hai cun la decisiun d'accumpagnar trais protagonists: L'expert d'agricultura svizzer Curdin Foppa, l'investur Miho Svimonishvili e la scolara Tatja. En il decurs dal project è lura anc l'istorgia dal signun e pur svizzer e la gidantra indigena en chascharia vegnida vitiers.

Per filmar dovri inqual equipament. E quel ha Curdin Fliri stuì prender cun el tar mintga viadi. La bagascha è uschia stada bain emplenida: ina u duas cameras, microfons, plirs objectivs, ina drona, in laptop, in stativ, avunda accus.

Georgian – ina lingua unica

La sfida principala per Curdin Fliri è stada la lingua. Far intervistas è difficil, sch'ins na chapescha betg in pled. Quai saja cunzunt stà difficil tar ses viadi sulet en il dachasa da Tatja, di il videograf.

Ma betg mo la lavur al lieu ha la lingua difficultà. Cun las translaziuns daventa er il tagl dal film ina pli gronda sfida. E per restar tar il tema: Per il film da gnanc in'ura ha Curdin Fliri gì la schelta or da var 60 uras material da film. Quai dovra inquala greva decisiun da scursanir istorgias ch'avessan dabun dapli.

In project da plirs onns

L'emprim viadi en Georgia è stà il prim da november 2021. En il decurs da dus onns è capità bler en las tschintg fin sis lingias da raquint. En il temp da fin a tschintg mais tranter las visitas hai era dà midadas e decisiuns cardinalas. Qua ha il filmader dà gronda bregia da cuntinuar l'istorgia senza ch'i manca memia bler a l'aspectatur.

Er il Telesguard ha accumpagnà il project

Impressiuns da la premiera da film

Ils 11 da schaner 2024 è stada la premiera dal film «In Plantahof per la Georgia» da Curdin Fliri en il Weber-Hörsaal dal Plantahof a Landquart.