Madlaina Lys creescha dapi passa in decenni candelabers cun plattinas da porcellana. Objects ligers e fraschels che paran da sgular. Ses emprim candelaber penda en l’ustaria che sa chatta en la tur da l'universitad da Turitg. Ses pli nov candelaber ha ella realisà per in lieu commemorativ en in anteriur arcun da graun a Lübeck. I sa tracta da sia pli gronda ovra enfin uss: prest tschintg meters e mez lung, passa in meter lad, var 650 fils e nundumbrablas plattinas da porcellana. Ina e scadina montada a maun.
Per mai n'è quai betg ina chaussa da pazienza, mabain da concentraziun.
Picturar senza pensar
Tar sia emprima exposiziun aveva Flurin Bischoff var 20 onns. Il tema da sias ovras: nivels. Flatgs e tacs interesseschan anc adina Flurin Bischoff. En novas serias da maletgs cumbinescha el tacs, stritgs e lingias. I va per dinamica e ritmica. Qua e là sa sviluppan cuntradas ord dal caos da lingias e surfatschas, da stgir e cler. La pictura è mo ina fassetta da la lavur artistica da Flurin Bischoff. Ses interess è vast, el s’entusiasmescha per las pli differentas sfidas. El creescha glischs, installaziuns, punts e funtaunas. La pli nova funtauna sa chatta en il curtin dal chasti Aspermont a Sagogn.
Jau dovr tuts dus: Il mund da la pictura che lavura senza il chau, e tschellas lavurs che sforzan il chau da chattar soluziuns.
D’enviern en l'atelier, da stad en giardin
Dapi prest 40 onns tgiran e cultiveschan Madlaina Lys e Flurin Bischoff lur giardin da flurs sut Lavin a la riva da l'En. Ni in ni l’auter dad els dus aveva experientschas dad ortulan u ortulana. Els han emprendì cun empruvar e cun far sbagls. Oz è lur giardin ina oasa da bellezza. Ina giada ad emna furneschan els lur flurs a butias da flurs ed hotels en l’Engiadin’Ota. A l’entschatta era il giardin la basa per lur existenza, oz èn quai lur lavurs artisticas.
Stimar ed enervar
En lur giardin han els emprendì da collavurar, da discutar ed adina puspè planisar communablamain las lavurs dal di. Oz èn els uschè lunsch ch’els schazegian la provocaziun vicendaivla. Cunzunt en connex cun la lavur artistica san questas dispitas metter en moviment in process e manar enavant tar insatge fritgaivel.
Cun enervar provochescha ella mai. E forsa stim jau quai la fin finala.
