Ina buna tschuncantina persunas arriva en la sala dal restaurant Giesserei a Turitg Oerlikon. L'atmosfera è lucca e la glieud sa legra sin il concert. Curt suenter las set cumenza quel, cun l'emprima chanzun «Da quai chi sa tratta sa vo jau quintar». Suenter suondan chanzuns popularas enconuschentas sco «Che fast qua tü randulin», «Ferm tabac», «Fila fila» e bleras autras pli. En tut preschentan Aita Biert e Men Steiner 21 chanzuns. Ed a la fin datti perfin anc in supplement, nua che l'entir public è envidà d'era chantar. L'entir concert, ch'è vegnì organisà da l'Uniun dals rumantschs Bassa, chattais Vus qua.
Dad ina vart èsi fitg bel, jau hai grond plaschair, ma igl è era in zic trist. Pertge i va a fin ina lunga èra da tradiziun.
Cumenzà avant 50 onns
A chantar ensemen han Aita Biert e Men Steiner cumenzà ils onns 1970. Da lez temp visitava Men Steiner regularmain il bab dad Aita, il grond scriptur engiadinais Cla Biert (*1920 – †1981). El aveva ramassà quasi tuttas chanzuns rumantschas, per conservar la cultura rumantscha. Uschia enconuscheva Aita questa tradiziun gia da pitschna. Men Steiner, ch'ha emprais da magister, ha scrit sez bleras chanzuns, ha chantà cun Aita ed era sunà cun ils Fränzlis da Tschlin. Per la cultura da musica rumantscha va a fin ina gronda èra. Lur emprim disc cumpact han els registrà il 1982. Quest stil da chantar e preschentar chanzuns resta unic, ma n'ha er betg uschè bleras imitaturas u imitaturs.
Jau na crai betg che quellas chanzuns moran dal tut. Cun il temp segir, tut quai che viva mora ina giada. Ma sche nus essan en cumpagnia, lura datti bleras persunas ch'enconuschan anc tut quellas chanzuns e che pudessan era dar vinavant ellas.
Turnea da cumià gia il 2021
La turnea da cumià ha cumenzà l'onn 2021. Cun concerts a Zuoz, Val Müstair, Segl, Strada e Cuira era la turnea gia stada quasi a fin. Be in concert a Turitg mancava anc: Ma lura è vegnì tranteren la pandemia da corona. Uschia è il concert da la derniera stà pir dus onns pli tard a Turitg.
Insacura èsi da finir. Sch'i fiss da spetgar fin ch'jau sun 90 onns... na, jau crai ch'igl è schon gist ussa, ussa faschain in punct.
Ins di igl è da finir cura ch'igl è bel, cura che las vuschs èn anc bunas. Jau na vuless betg chalar ch'igl ha num ma uss è ella veglia e la vusch n'è betg pli buna. Quai na vuless jau betg.
