Cun il «deal» han las vischnancas Flem, Laax e Falera cumprà las 30 pendicularas – inclusiv il Flemxpress –, 216 kilometers pista, 5 snowparks e 2 halfpipes per 94,5 milliuns francs.
«Ti pos tschertgar ina societad en Svizra ch’ha indrizs uschè novs», di Reto Gurtner, il president dal cussegl d’administraziun da las pendicularas Arena Alva. 80 milliuns francs importia be l’investiziun en la nova pendiculara da Flem, il Flemxpress.
La Finanz Infra n'è nagut auter ch’ina banca.
Il grond avantatg per las vischnancas cun il sistem da «sell-and-lease-back» che la Finanz Infra porscha vesa Reto Gurtner en cas che l'Arena Alva giess concurs. Las vischnancas hajan lura la pussaivladad da laschar vi ils indrizs ad insatgi auter, da manar sezzas u da stgarpar giu tut. E questa decisiun possian las vischnancas prender entaifer dis, declera Reto Gurtner.
Destinaziun attractiva cun sfidas
Abitaziuns da vacanzas vegnan cumpradas nua ch’igl è attractiv. Per possessuras dad abitaziuns da vacanzas saja questa regiun fitg attractiva perquai che Flem Laax Falera haja ina da las meglras purschidas l’enviern, uschia Reto Gurtner. Ed i saja ina da las pli bellas cuntradas era la stad.
La valita da las abitaziuns da vacanzas è ida ensi ils davos set onns per 100 pertschient.
Ma il problem saja che las abitaziuns da vacanzas sajan en media be occupadas 24 dis l’enviern (che cuzza quatter mais) ed otg dis la stad (che cuzza otg mais).
In'uniun da traffic na dovria betg pli
Marketing stoppia mintga purtader da prestaziun far sez. «E perquai na dovri era nagin timun ed era nagina uniun da traffic», di Reto Gurtner.
Hannes Ingold, sez hotelier e president da l’uniun da hoteliers conceda ch’ils hoteliers hajan emblidà dad acquirir osps ordaifer la Svizra e la Germania. Ma quai vegnia uss midà.
Ins ha ruassà memia ditg sin las arbajas.
Il budget per far marketing saja adina stà stretg, di Reto Gurtner. Ed in ulteriur problem: en la hotellaria è ils davos onns vegnì investì pauc. Vitiers vegn: la regiun da Flem Laax Falera na pon ins betg pli engrondir. Uss èsi da guardar ch’i funcziuna sur onn. La stad haja numnadamain in’enorma capacitad.
«Il Flemxpress è vegnì construì per promover la stad, be per la stad. Quel n'avra l'enviern nagina pista», di Reto Gurtner. Per quel motiv han ins tschertgà in sistem autonom, uschia ch’ins po laschar ir las pendicularas era sch’igl ha be 200 u 300 persunas.