Dapi ses return hai da bleras ramurs ed in pèr davosas brevs blauas al timun. E Reto Gurtner, l'acziunari da maioritad, è dapi lura vi da restructurar quest timun. La finamira saja stada da far urden, declera el. L'organisaziun saja en ils davos onns ida en ina fallida direcziun, vegnida memia cumplexa.
Igl è ì en la faussa direcziun. L’Arena Alva è vegnida bajegiada si sco ina cooperativa u in’organisaziun dal stadi.
Cur ch'i va per dumondas davart la direcziun ed il manaschi da l’Arena Alva è Reto Gurtner reservà, la dumonda da dar in'intervista ha el en in emprim mument refusà. La segunda dumonda ha el alura consentì, discurrer da persunas na vegnia dentant betg en dumonda. Tar ina intervista en ses biro a Murschetg ha el lura dà scleriment.
Simplifitgar è la finamira
Reto Gurtner accentuescha che las structuras da l’Arena Alva sajan en realitad fitg simplas, quai cun las fatschentas affiliadas ch’èn independentas. La finamira saja da reducir la cumplexitad e far l’interpresa pli transparenta, uschia l’um che ha definì durant passa quatter decennis la destinaziun da Laax Flem Falera.
L'Arena Alva cun sias firmas affiliadas
-
Bild 1 von 1. L’entira Arena Alva occupa en tut var 1’100 persunas durant la stagiun d’enviern. La stad èsi 400 persunas. Bildquelle: RTR / WAG.
Simplifitgar munta tenor Reto Gurtner ch’i na dovra betg in mainafatschenta, mabain la buna glieud cun cumpetenza da fatg sin il stgalim a mez da l’interpresa. En la direcziun hai uss trais enstagl da tschintg sezs, dasperas datti manaders e manadras operativas.
Documentar ils process
Las midadas da persunal en la direcziun hajan era demussà l’impurtanza da documentar ils process. Entras las midadas saja savida ida a perder, cunquai ch’ina gronda part dals process da lavur na sajan betg stads documentads. Reto Gurtner accentuescha en quest connex l’impurtanza da documentaziuns, e betg la pussanza da singulas persunas. Da demussar ils process pass per pass saja ozendi indispensabel era puncto segirtad. Concret conceda l’um da fatschenta era sbagls che han manà ad accidents.
Tar quels accidents che nus avain gì, hai era mancà tar la documentaziun dals process tar nus.
Il president dal cussegl administrativ na vesa il pass enavos en fatschenta betg sco in pass enavos en l’operativa, mabain in return sco cussegliader che sustegna davostiers. El admetta ch'i saja stà in sbagl da pensar ch'i dettia ina segunda persuna cun las medemas cumpetenzas ch'el haja sviluppà durant 40 onns. La situaziun cun las ed ils anteriurs mainafatschenta prenda el sin el, di Reto Gurtner cleramain.
Durant il discurs vi da la maisa da sesida da lain cun il design da Zai ski, stat Reto Gurtner da temp en temp agil en pe e mira tras la fanestra en la cuntrada tranter Murschetg ed il lai artifizial d’Isla, il lai da l’onn 1962, in dals projects innovativs en la destinaziun.
Enavos a las ragischs
Il viadi en l’avegnir giaja enavos tar las ragischs, tar ina sumeglianta structura d’interpresa sco pli baud, manegia Reto Gurtner. La finamira da l’Arena Alva na saja betg sa midada. L'interpresa veglia vinavant esser enconuschenta per libertad, design, freestyle e greenstyle. La marca venda in stil da vita, l'uschenumnà lifestyle. Vi da quel haja l’Arena Alva lavurà ils ultims 20 onns.
Nus stuain star là, nua che nus essan ferms e betg far memia bler nua che nus n’avain betg la cumpetenza.
Durant tut quels onns è la destinaziun Laax Flem Falera creschida cun l’Arena Alva. Reto Gurtner vegn cun l’exempel da las chasas da vacanzas: Igl haja ussa passa 10’000 abitaziuns da vacanzas cun ina valita da 8,8 milliardas francs. Quai pervia che l’Arena Alva ha bajegià si in’attracziun en ils davos 30-40 onns.
Funcziunar sco in’ura svizra
Bajegiar si tut quai, saja stà la pli greva chaussa, ma l’Arena Alva dependia ussa betg d’ina persuna, manegia Reto Gurtner. L’Arena Alva stoppia la fin finala funcziunar sco in'ura svizra, il mecanissem sto funcziunar senza menda. Là sajan ins en il passà stads cumplitgads. I duai restar simpel, concluda Reto Gurtner.
Guardond en il futur, discurra l’um da 70 onns era davart l'intelligenza artifiziala. Ils proxims tschintg onns vegnia quella a midar il mund a moda radicala. L’Arena Alva è vi da sviluppar atgnas schliaziuns.
Reto Gurtner vul che l'interpresa daventia pli internaziunala e ch'ella optimeschia l'occupaziun dals hotels. El vul carmalar natiers la glieud da l’Asia. Davent da 2014 hai gia dà ina collaboraziun en China, corona haja retardà il svilup, ma Reto Gurtner vul cuntinuar cun quella strategia.
Chalar da far il pumpier
La direcziun da l’Arena Alva exista ussa da trais persunas: Alicia Martinez, Claude Bravi e Haempa Maissen. Reto Gurtner vesa ses job en il mument da sustegnair la nova direcziun. Ad el saja conscient, e quai di el era cleramain, ch’i na dettia betg in segund Reto Gurtner, ma i dettia pliras persunas che sajan exact uschè fermas sco el sin in sectur, ma forsa betg sur l’entir spectrum.
Tranteren sun jau sco in pumpier. Cura ch’i brischa hai jau stuì siglir en.
Reto Gurtner declera ch'el na vul betg pli esser operativ en l'interpresa e plaunsieu prender dapli temps per sia famiglia. El è persvadì che l'interpresa è sin la dretga via e ch'ella po cuntanscher megliers resultats cun main persunal, ma cun in focus pli cler, cun in focus da laser, sco el numna quai.