L'accident è capità durant lavurs da mantegniment sisum in mast. L'emprendist dal segund onn è vegnì tschiffà da la part sura d'ina cabina ed è vegnì tratg sur il mast ora ed è crudà radund 40 meters e sa blessà mortalmain. Il rapport identifitgescha plirs facturs che han manà a quest cas fatal, tranter auter l'absenza d'ina procedura d'avertiment fidada e l'utilisaziun insuffizienta da l'equipament persunal da protecziun cunter crudada.
Betg segirà e nagin sistem d'avertiment fidabel
Sin il mast lavuravan in emprendist dal quart onn e l'emprendist dal segund onn. Els unschevan parts dal mast. Las lavurs per quest mast eran a la fin ed els sa preparavan per ir cun ina cabina a la staziun a val. Ils emprendists eran sin varts oppostas dal mast, perquai n'ha il segund emprendist betg vis tge ch'è exact capità cun l'unfrenda.
Tenor il rapport dal SUST n'era il giuven da 17 onns betg segirà encunter ina crudada, malgrà ch'el purtava l'equipament da protecziun necessari. Il betg esser stà segirà ed il fatg ch'i n'haja betg dà in sistem d'avertir el a moda fidabla da l'arrivada da la cabina en direcziun culm hajan chaschunà l'accident. Daco che l'emprendist n'era betg segirà na po il rapport betg respunder, i mancan perditgas.
Controlla entras ina persuna dal fatg ha mancà
In dals temas centrals dal rapport è ch'ils emprendists n'eran betg survegliads d'ina persuna dal fatg cun experientscha. Da surdar l'incumbensa da survegliar l'emprendist pli giuven a l'emprendist dal quart onn na saja betg stà adequat – mo persunas cun ina scolaziun finida sajan qualifitgadas per talas controllas.
Il SUST ha plinavant constatà ch'il temp da lavur maximal per lavurers giuvens saja vegnì surpassà pliras giadas il mais avant l'accident – na constatescha dentant nagin connex direct cun l'accident. Era haja ina documentaziun detagliada da las scolaziuns dals emprendists mancà, entras quai na saja betg stà pussaivel da confermar ch'els hajan gì tut las scolaziuns necessarias per las lavurs.
Recumandaziuns da la SUST
La SUST formulescha pliras recumandaziuns da segirezza per meglierar las cundiziuns da lavur:
- Implementar sistems d'avertiment fidabels.
- Garantir il diever consequent d'equipament da protecziun persunal.
- Controllar lavurs malsegiras d'ina persuna dal fatg.
- Garantir ch'il temp da lavur vegnia resguardà.
- Meglierar la documentaziun da scolaziuns dals emprendists.
Arena Alva ha instradà mesiras
Il rapport final dal Servetsch svizzer d'inquisiziun da segirezza mussa che la patruna da l'emprendist, l'Arena Alva, ha gia implementà mesiras. Tranter auter haja l'interpresa testà ed empustà in sistem d'avertiment per collavuraturs che lavuran sin ils masts durant che las pendicularas circuleschan. Plinavant hajan ins meglierà la documentaziun da scolaziuns da segirtad – participants ston confermar quellas a scrit.
Las mesiras da segirtad ed il concept da segirtad vegnan mintg'onn controllads d'in post extern.
Paucas reglamentaziuns en la branscha
Tut en tut mussa il rapport ch'i saja urgentamain necessari d'examinar e meglierar ils standards da segirtad en la branscha da pendicularas per uschia impedir accidents en il futur e da garantir la segirezza dals collavuraturs. Quellas mesiras èn instradadas e vegnan controlladas da l'Uffizi federal da traffic. Tenor quel sajan las mesiras per part implementadas. L'uffizi parta dal fatg che tut las mesiras vegnan ad esser implementadas il 2027.
«Dapi l’accident avain nus prendì mesiras vastas»
L’accident dals 19 da december 2022 ha tutgà grevamain la Gruppa Arena Alva e gì consequenzas. En quest connex ha la FMR tschentà pliras dumondas a l’interpresa a Laax. La pledadra da medias, Martina Calonder, ha prendì posiziun.
FMR: L’accident tragic dal december 2022 ha tutgà Voss’interpresa sin il viv, er ord vista emoziunala e persunala. Tge consequenzas ha quai gì dapi lura?
Martina Calonder: Nus essan anc adina consternads profundamain da quest accident tragic d’in da noss emprendists e deplorain fitg quai ch’è schabegià. Nus prendain part al cordoli dals confamigliars, amis e da tuts pertutgads. Il rapport dal Servetsch svizzer d’inquisiziun d’accidents (SUST) e las recumandaziuns da segirezza prendain nus fitg serius. Nus avein era gia realisà quellas.
Tgeininas èn quai?
Dapi l’accident avain nus prendì grondas mesiras en noss manaschi che duajan augmentar vinavant la segirtad. Nus avain realisà tranter auter il suandant:
- Gidà da sviluppar, testà ed installà in sistem d’avertiment e d'alarm ch'avertescha ils montaders che lavuran sin la pitga da la cabina ch'arriva.
- Rinforzà plazzals cun glieud dal fatg e cun experientscha che survigilescha lavurs privlusas.
- Posts externs evalueschan e surlavuran noss concept da segirtad.
- In engaschi activ en ina gruppa da lavur specifica da la branscha da pendicularas che duai meglierar la segirtad.
Quants emprendists da mecatronist da pendicularas scolais Vus insumma?
Actualmain èn quai sis giuvenils en differents onns d’emprendissadi.
Avais Vus prendì mesiras supplementaras per garantir lur segirtad?
Cun realisar fitg consequent las recumandaziuns dal SUST, sco gist descrit, avain nus risguardà tut ils aspects pussaivels.
La procedura penala da la Procura publica grischuna en quest cas è anc averta. Co survegnan Voss emploiads involvids sustegn moral da dumagnar questa lunga «istorgia» che paisa grev?
Igl è propi ina da nossas finamiras da sustegnair noss emploiads tenor nossas pussaivladads ed il meglier pussaivel en situaziuns pretensiusas. Lur segirtad ed il schurmetg da lur sfera privata ha la prioritad la pli auta per nus. Nus sperain perquai ch’ins chapeschia che nus na prendain betg posiziun tar dumondas che pertutgan singuls collavuraturs e nossas disposiziuns internas.